Ерлі-зайыптылар ісі. Астанада 7 жылға бас бостандығынан айрылған ер адам мен әйелдің тумалары істі қайта қарауды сұрап жүр. Қорғаушыларымен бірге баспасөз мәслихатын өткізіп, оларға тағылған айып және үкіммен келіспейтінін жеткізді.
Ерлі-зайыптылардың қамалуына әкеп тіреген іс алғаш рет 2021 жылы тіркелген. Нақты айтқанда, жеке кәсіпкерлік нысанының бірінде есепші болған Мария Насриденованың жұмыстан кетуі кезінде басталған. Бастапқыда оның шешіміне ұйым иесінің еш қарсылығы болмаған көрінеді. Алайда арада бірнеше ай өткен соң, құны 11 миллион теңгені құрайтын тауардың жетіспейтіндігін айтқан. Кейін бұл көрсеткіш 70 миллион теңгеден асқан.
Әсел Токаева, қорғаушы:
- Зардап шегуші тарап 72 млн теңгеден астам қаржы жымқырылды деп айтқанымен, ол тауар-материалдық құндылық туралы дәлел келтірмеді. Ал апеллияциялық алқа кезінде мүлде жаңа құжаттар әкелді. Сонда оның айналымдағы қаржысы бір млрд-тан асып кеткенін көрсетті. Ал салықтық мәліметтерде төлем туралы құжат жоқ. Одан кейін прокуратура үшінші тұлғаны тартуды сұрады. Сол кезде Нұрсұлтан Жакупов іске тартылды. Бұдан бөлек, ең басты дерек – тауар құжаттары назарға алынбады. Оны берген кісі бұрын қайтыс болған.
Нұрсұлтан Жакупов пен Мария Насриденованың заңсыз қамалғанына туыстарының да еш күмәні жоқ. Олар екеуінің де босатылуын сұрайды.
Әсел Асанова, Н. Жакуповтың апасы:
- Мария өнім алып, менің ініме бергендей, ал інім ол тауарды сатқан деп ұстап отыр. Бірақ ешқандай дәлелі жоқ оған. Тек қана серіктестердің сөзі бойынша «иә, Нұрсұлтан осындай істеді», - деп сонымен жауып отыр. Бұл істің көп сұрақтары бар. Менің келінім Марияның, менің інімнің екі кішкентай баласы бар. Қазір менің келінім жүкті. Кішкентай сәби күтіп жүрміз. Оған қарамастан қамаулы, түрмеде отыр.
Ал бұл іс сотта тағы бір мәрте қаралмақ.
Алина Райымбаева, Астана қалалық соты баспасөз қызметінің басшысы:
- Аталған іс қазіргі таңда апелляциялық сот алқасында. Тараптардың барлық дәлелдемелері жоғары тұрған сатының сот отырысында, яғни апелляциялық сатыда заң шеңберіне сәйкес қаралатын болады.
Апелляциялық шағымның қаралуы сәуірдің ортасына белгіленген. Қортындысы жария болмақ.
Әнуарбек Мырзатайұлы, Мейірбек Беспаев
