«Biz Birgemiz Qazaqstan» қорының басшысы Перизат Қайратқа қатысты тергеу аяқталды. Жуырда ол анасымен бірге сот алдында жауап береді. Бұл туралы Сенат кулуарында Қаржы мониторингі агенттігі төрағасының орынбасары хабарлады.
Жеңіс Елемесовтің сөзінше, келтірілген залал 3,5 млрд теңге деп бағаланып отыр. Енді тараптар сотқа дейін қылмыстық іс материалдарымен танысады.
Еске сала кетейік, Перизат Қайрат су тасқыны кезіндегі қаражатты және Палестина халқына гуманитарлық көмекке жиналған 200 млн теңгеден астам ақшаны ұрлады деген күдікке ілінген. Кейін белсендінің мүмкіндігі шектеулі балаларға арналған оңалту орталығын ашу үшін заңсыз 22 млн-дай пайда тапқаны анықталды.
Жеңіс Елемесов, ҚР ҚМА төрағасының орынбасары:
- Бір ғана сотталушы емес, одан бөлек шешесі бар. Оны да алаяқтық бабымен қылмыстық жауапкершілікке тартып жатырмыз. Қызына көмектесіп, түскен ақшаны өз шотыңа алып, оны банктен шешіп, үй, көлік алған. Гүл сататын магазиндер сатып алуға көмек берген.
