Алматыда төтенше жағдайлар департаменті басшысының үш бірдей орынбасары қылмыстық жауапқа тартылды. Сондай-ақ жеткізілген жабдықтың сапасы мен сәйкестігіне тиісті бақылау жүргізбеген техникалық қадағалау мамандары да жаза арқалады. Еске сала кетсек, былтыр 23 қаңтарда Алматыда жер сілкінісі болған еді. Сол кезде автоматтандырылған ескерту жүйесі іске қосылмай, халық уақытылы құлақтандырылмады. Осы жағдайға қатысты Алматы қаласының прокуратурасы тексеру жүргізді. Сөйтіп бюджет қаражатын жымқыру белгілері анықталды. Алматы гарнизонының әскери соты айыпталушыларды кінәлі деп танып, оларды бас бостандығынан айыру және мемлекеттік, әрі квазимемлекеттік органдарда лауазымды қызмет атқару құқығынан айырды.
