Кеше Монако қаласында УЕФА Чемпиондар лигасының жеребе тарту рәсімі өтіп, топтық кезеңге жолдама алған кіл мықтылар өз қарсыластарын анықтады. Қазақ жанкүйерлері де осы шараны асыға күткен болатын. Тұңғыш рет мықтылар қатарына қосылған «Қайраттың» да қарсыластары белгілі.
Сонымен Алматыға Мадриттің «Реалы» келетін болды. Осынау жарыста 15 дүркін жеңімпаз атанған жалғыз команда осы «Реал». Құрамында кіл мықтылар өнер көрсететін Карольдік клубті енді «Қайрат» фанаттары асыға күтеді. Сондай-ақ Белгияның «Брюггесімен» грекиялық «Олимпиакос» және Кипрлік «Пафос» командалары да Алматыға қонаққа келеді. Жаңа ережеге сәйкес әр команда топтық кезеңде 8 ойыннан өткізеді. Төртеуі үйде, төртеуі сырт алаңда. «Қайрат» Лиссабонда жергілікті «Спортингпен» және Лондонда «Арсеналмен», Италияда «Интермен», Данияда «Копенгаген» клубтарына сынақ тапсырады. Топтық турнирдің ойын кестесі ертең белгілі болады. Қарсыластардың ішінде тіске жұмсағы Кипрдің «Пафосы» демесеңіз, өзгелерінің ұпай ұстата салуы екіталай. Дегенмен «Қайрат» қайрат көрсетеді деген сенімдеміз.
