17:00Эфирде: Телевикторина. "Бегом за деньгами"
18:00Әрі қарай: Новости. Итоги дня
×

Ескерту

JUser: :_load: Келесі ID-ге ие қолданушыны жүктеу мүмкін болмады: 149
+7 (7172) 757 555
sale@khabar.kz

Астана – Қазақстанның мәдени орталығы

Астана – Қазақстанның мәдени орталығы

Бұл – Елорданың 20 жылдығында «Астана Опера» театрының Бурабай баурайында өнер көрсеткен сәті. Елбасының бастамасымен салынған Орталық Азиядағы ең үлкен театр саналатын өнер ордасы әр маусымда 8 жаңа қойылым ұсынады.

«Астана Опера» театрына әлем мойындаған «Ла Скала», Ресейдің атақты «Марийн» театрының, Грузия, Франция мен өзге де елдердің театр ұжымдары келіп өнер көрсетеді.

Астаналық өнер майталмандары қазақ мәдениетін Италия, Германия, АҚШ-қа гастрольдермен барып танытып жүр. «Қыз Жібек», «Дон Кихот», «Аида» сынды талай туындыны жергілікті тұрғындар бағалап үлгерді.

Иә, мәдениет – халықтың рухани болмысы. Елбасының өзі ұлттық мәдениет сақталмаса, ешқандай рухани жаңғыру болмайтынын үнемі айтады.

Биыл тіпті халықты ұлттық мәдениет пен бірегейлікті сақтау мақсатында Президент Ұлттық домбыра күнін бекітті.

Нұрсұлтан Назарбаев, Қазақстан Республикасының Президенті:

- Домбыра қазақтың жаны, рухы, тарихы, салт-дәстүрі, бүкіл бітім-болмысы деп айтуға болады. Ол ұлы даланың төсінде ерте заманнан бері халқымызбен бірге жасап келе жатыр. Күміс көмей әншілеріміз домбыраны қолға алып, сайын даланы жаңғыртып ән салған. Қастерлі аспап бүгінде симфония мен операға әр беріп, классикалық өнердің ажырамас бөлшегіне айналып келеді. Бұл – қазақтың бренді мен паспорты, ешкімге ұқсамайтын қайталанбас келбеті.

Астананың еліміздің мәдени келбетін қалыптастырудағы рөлі зор. Республика бойынша 68 театр болса, соның 6-ы елордада. Әлемнің әйгілі композиторлары, режиссерлері мен әртістері Қазақстанның бас қаласына келіп өнер көрсетеді. Биыл елорда мәдениетінің айнасы іспетті «Самғау» халықаралық театр фестивалі қаншама танымал өнер тұлғаларын бір ортаға жинады. Сол секілді қазақстандық мәдениетті де жаһанға таныту жобасы сәтті іске асырылуда.

Осыдан 10 күн бұрын ғана «Астана Балет» театры Монакоға гастрольдік сапармен барып, көрерменнің ыстық ықыласына бөленді.

Дилара Шомаева, «Астана Балет» театрының жетекші солисі:

- Біздің «Астана Балет» театры Монте-Карлодағы «Гримальди форумда» өнер көрсетіп жатыр. Біз үшін бұл керемет қуаныш. «Астана Балет» гала бағдарламасы мұндағы жұртшылықтың көңілінен шығып жатыр деп толық сеніммен айта аламын. Әртістердің көңіл-күйі де, дайындықтары да өте жақсы.

Алдағы 3 жылда «Астана Опера» және Абай атындағы Қазақ мемлекеттік академиялық опера және балет театры «Абай», «Қыз Жібек», «Біржан-Сара» сынды ұлттық опера жауһарларын Ресей, Италия, Франция, Түркия, Қытай, Жапония мен Оңтүстік Кореяда көрсетуді жоспарлап отыр.

Авторлары: Индира Жылқайдарова, Аманжол Байғазин

Сондай-ақ...