Агенттік ашылған жылдары жұрт «Хабар» арнасының спорт жаңалықтарын, спорттық бағдарламаларды және тікелей трансляцияларды үзбей көретін. Өйткені бұл саланың басы-қасында білікті мамандар Диас Омаров пен Амангелді Сейітханов тұрды. Олар агенттіктің барлық мүмкіндігін тиімді пайдаланып, елімізде және шартарапта болып жатқан қуанышты хабарларды қызықты әрі жедел түрде жанкүйерлерге жеткізе білді. Өкініштісі, аузы дуалы сол азаматтар қазір арамызда жоқ. Алайда олардың «Хабарға», жалпы спорт журналистикасына сіңірген ерен еңбектері ешқашан ұмтылмайды!
90-шы жылдардың соңы мен 2000-ші жылдардың басында қазақ телевизиясында «Хабардың» айдарынан жел есіп тұрған кез еді. Агенттіктің қай саласы болмасын өз ісін жетік білетін сен тұр мен атайын мамандар қызмет етті. Солардың арасында спорттың жілігін шағып майын ішкен Диас Омаров пен Амангелді Сейітханов, «Хабардың» отымен кіріп, күлімен шықты. Және ол еңбектері еш кеткен жоқ. Көзіқарақты көрермен ағаларымызды алыстан танитын еді. Бұл кісілер жеке имиджін ғана қалыптастырып қойған жоқ, Хабардың абырой беделінің артуына да үлкен үлес қосты.
Телмұхамед Күдеров, «Хабар» арнасының 2000 жылдардағы спорт шолушысы:
- Әрине, ол жерде мына Бекзаттардың, Ермахандардың жеңісі қазаққа рух сыйлағандығы жасырын емес. Бірақ сол сәттегі істеген еңбектері бұл дүниеде жоқ Диас ағамыз бен Амангелді ағамыздың еңбектері бүкіл қалың қазаққа өздерінің биязы даусы мен бүкіл қалың қазақтан сүйінші сұрағандары да әлі күнге дейін бүкіл қазақтың есінде мәңгілікке сақталып қалады деген үміттемін.
Рас, сол жылдары «Хабардың» техникалық әлеуеті мен мүмкіндіктері мол еді. Қазақ жанкүйерлері 1998-ші жылы тұңғыш рет футболдан әлем чемпионатын және 2000-ші жылы Сидней олимпиадасын тікелей эфирден тамашалай алды. Әлем спортын қазақша сөйлеткен Амангелді Сейітханов осы тұста талантымен таныла білді. Әбекеңе ағасы Диас Ілиясұлы демеу беріп, нәтижесінде көрермен сүйсініп көретін әдемі комментаторлар тандемі қалыптасты.
Қанат Базылхан, 24 кz арнасының шығарушы редакторы:
- Маған сондай бақыт бұйырды. Мен екі кісімен де бірге жұмыс істедім. Екі кісінің де алдын көрдім. Амангелді Сейітхановтың шәкірті болғаннан кейін Диас ағамызбен бірге бір кабинетте отырдық. Сонау 2000-ші жылдардағы екеуінің бірге жүргізген үні әлі құлағымызда. Мәңгі жатталып қалды. Диас Омаров ағамыз да өте тәжірибелі комментатордың бірі болды. Ол өйткені кәсіби футболшы болған адам. Кәсіби футболды білгеннен кейін жүргізу мәнері де, кәсіби деңгей де болды.
Диас Омаров пен Амангелді Сейітхановтың комментаторлық жұмыстарынан бөлек тілшілік тіршіліктері болды. Күнделікті спорт жаңалықтарын және апта сайынғы «Хабар Спорт» бағдарламасын эфирге шығарды. Әлеуметтік және танымдық бағдарламалардың да тізгінін ұстаған Амангелді ағамыздың жан-жақты екеніне жұрт сол кезде-ақ тәнті болған. Әттең, арамыздан тым ерте кетті. Қазақ телевизиясына әлі де берері мол еді. Арнаға адал болған азаматтардың алды пейіш, арты кеніш болғай!
Авторы: Жандос Айтбайұлы
