Аралды құтқару бойынша халықаралық қор жұмысы жанданады

Еліміздің Халықаралық Аралды құтқару қорының жұмысын қайта жандандыру туралы ұсынысын Қырғызстан қолдап отыр. Бірақ «Алдымен трансшекаралық су ресурстарына қатысты бірқатар мәселені шешіп алу керек», – дейді. Экология, геология және табиғи ресурстар министрі Мағзұм Мырзағалиев Қырғыз еліне арнайы іссапармен барып, осы мәселелерді талқылап қайтты. Кездесу кезінде Шу-Талас бассейніне қатысты мәселе де назардан тыс қалмады. Екі елдің жұмыс топтарының алғашқы отырысы осы бейсенбіде өтпекші.

Мағзұм Мырзағалиев, Қазақстан Республикасының Экология, геология және табиғи ресурстар министрі:

- Шу өзені арқылы судың жеткілікті мөлшерде келмеуі басты проблемалардың бірі болып табылады. Сондықтан біз қырғыз тарапына онлайн режимде гидрологиялық мониторинг жүргізуді ұсынып отырмыз. Ал Нарын-Сырдария бассейніне келетін болсақ, биыл Түркістан облысының қажеттілігі үшін 300 млн текше метр су алынды. Ал келесі жылы 550 млн текше метр су сұрап отырмыз.