Қызылорда облысында 25 әлеуметтік нысан салынуда

Сәйкесінше өңірдегі құрылыс көлемінің басым бөлігі әлеуметтік нысандардың үлесінде. Ағымдағы жылы білім, денсаулық, мәдениет және спорт саласы бойынша 25 көпбейінді кешен құрылысы басталып, 12-сі пайдалануға берілді. 

Доңыз жылы ашылған нысандардың көлемі жағынан ең үлкені – жастар орталығы. Сырдарияның сол жағалауына орналасқан сәулетті кешен дарынды, өнерпаз өрендердің басқосу алаңына айналды.

Бауыржан Мәстеков, Жастар ресурстық орталығының директоры:

- 40 мыңға жуық жас жастар орталығының игілігін пайдаланды. ІТ кітапхана, фитнес, мәжіліс, түрлі бағыттағы шара ұйымдастыруға арналған арнайы залдармен қамтылған. Бұл – мемлекеттің жастарға жасалған қолдауы.

Ағымдағы жылы 10 білім нысанының құрылысы жүргізіліп, жартысы аяқталды. Республикалық бюджетке салынған Жаппасбай батыр көшесіндегі 600 орындық мектеп жуырда ел игілігіне берілмек.

Мұхамедиса Әлсеріков, Құрылыс, сәулет және қала құрылысы басқармасының басшысы:

- Құрылыс негізі 2 жылға есептелген. Өткен жылы басталды. Биыл жыл соңында пайдалануға қабылдаймыз. Бүгінгі күнде 49 млн теңгенің 5% ақшасы қалды. Қалған ақшасы игерілді. Қазір құрал-жабдық тасымалдау, монтаждау жұмыстары жүріп жатыр. Жаппасбай батыр көшесінде көпқабатты үйлерде қазір балабақша жоқ. Саяхат мөлтек ауданына 600 орындық мектеп келесі жылы басталады деп күтіп отырмыз. Басқа да құрылыстар бар. Келесі жылғы жоспар биылғы жылдан төмен болмайды.

Құрылыстағы негізгі облигациялар тұрғын үй нарығына тиесілі. Соңғы жылдары облыс орталығында 15 жаңа шағын аудан бой көтерді. Биылдың өзінде 46 көпқабатты үйдің құрылысы жүргізіліп, қызылордалықтар 720 мың шаршы метр тұрғын үйге қоныстанды.

Қуандық Нарымбетов, қала тұрғыны:

- Қорқыт ата атындағы ҚМУ ғалымдар үйінде тұрып келдім. Міне, енді өз пәтеріме жетіп, қуанып жатқан жайым бар. Қос баланың әкесімін. Жастар жылында өзіме қуаныш болып жатыр.

Айдана Алтай, қала тұрғыны:

- Бұл пәтерді осыншама уақыт күттім. 2016 жылдан бастап салымшы болып келемін. Бұған дейін жалдамалы пәтерде тұрдым. Енді қолым жетіп жатыр. Көп рахмет. Әр қазақ баспаналы болсын!

Айжан Жүсіпбекова, қала тұрғыны:

- Қаржыны жинақтап, осы дәрежеге жетіп отырмын. «Нұрлы жер» бағдарламасы арқылы пәтерге қол жеткіздім. Өзіме ұнаған қабаттан 3 бөлмелі пәтердің кілтін алдым. Мемлекетіміз осындай бағдарлама ашып, халыққа жағдай жасап отыр.

Құрыш қолды құрылысшылар келесі жылы да жұмыссыз қалмайды. Өңірде 31 нысан бой көтермек. Оның ішінен Сырдария сол жағалауына түсетін драма театры, жабық стадион және аурухананы ерекше атап өтуге болады.

Авторлары: Қамбар Бекенов, Қанат Еңсебаев, Айтмұхамбет Бәйділдаев