Малдың мазасын алған кеселден шаруалар арыла алмай әлек. Ал жауаптылар бұл аурудың аса қауіпті емес екенін айтып отыр.
Қала маңындағы Соколок каналының бойына қоныстанған шаруа қожалығына қарасты 90-ға тарта мүйізді ірі қараның барлығында дерлік қотыр ауруының белгісі бар. Шаруашылық иесі Нұрбек Есенқұлов жұқпалы тері ауруының желтоқсан айынан бастап байқалғанын айтады. «Каналда судың жоқтығынан осындай жағдай болып отыр»,– дейді ол.
Нұрбек Есенқұлов, шаруа қожалығының басшысы:
-Күзде судың каналға дұрыс айдалмауынан, қазіргі кезде каналда су болмауынан деп ойлаймыз. Қазір көріп отырғаныңыздай, каналда су тек табанында қалған. Ол су да шіріп, сасып кеткен. Қазір малымызды сонымен суаруға мәжбүрміз. Бұл енді қотыр тек менің шаруа қожалығымда емес, осы жердегі канал бойындағы шаруа қожалықтарының барлығында бар.
Шаруалар мұны су тасқынымен келген кесел деп те болжап отыр. Алайда аймақ ветеренарлары бұл жағдайдан хабарсыз. Тіпті қотыр ауруының есепке алынбайтынын айтады.
Нұркен Баяров, ветеринариялық бақылау және қадағалау комитетінің облыстық аумақтық инспекциясы басшысының орынбасары:
-Адамға қаупі жоқ, жыл сайын мал иелері қораға тұрар алдында өз қаражаты есебінен алдын ала емдік жұмыстар жүргізеді. Жүргізбеген соң міндетті түрде қотыр болады. Үкімет тарапынан ешқандай бұған дәрі-дәрмек бөлінбейді.
Жауапты мекеме мамандарының мәліметінше, желтоқсанға дейін каналға су айдалған. Енді 1 сәуірге дейін арнаны толтыру мүмкін емес екенін айтады.
Асланбек Рысжанов, «Табиғат» КМК директоры:
-Біз Жайықтың суын алып, Жайықтың суын беріп отырмыз. Ол жерге басқа суды қосып отырған жоқпыз ғой. Кешегі тасқын суда мал өліп, сол тасталды ма қайдан білеміз?/
«30 жылдан аса жөндеу көрмеген каналды тазалап, оны тереңдету жұмысына жобалық-сметалық құжат әзір тұр»,– дейді мамандар. Егер жөндеу жұмыстары басталса, көктемде де су айдалмай қалуы мүмкін. «Төрт түлік шіріген суды ішіп, тағы ауру жамай ма»,– деп шаруалар уайымдап отыр.
Авторлары: Асланбек Шығыр, Амантай Мәтенов, Жандос Рахметуллин
