Жезқазғанда эпидемиолог мамандар ауызсу сапасын тексеріп жатыр. Кеңгір су қоймасынан киік өлекселері табылғаннан кейін түрлі инфекция қоздырғыштары көбеюі мүмкін. Сондықтан бақылау күшейтілді. Күн сайын сынама алынып, зертханалық тексеру жасалады. «Әзірге химиялық және бактериологиялық көрсеткіштер қалыпты», – дейді мамандар. Дегенмен сақтық үшін тұрғындарға берілетін суға бірнеше мәрте хлормен залалсыздандыру жүргізіледі. Қазір қала халқы ауызсудың 70% осы ашық су қоймасынан сүзіп ішіп отыр.
Нұрбол Жолдыбаев, санитариялық-эпидемиологиялық бақылау басқармасының басшысы:
-Біз бұрын иісін, дәмін және түсін қарайтынбыз. Қазір енді аммиакқа қараймыз. Соны қостық. Себебі киіктің өлекселері аммиак шығаруы мүмкін. Ол өте зиян. Бүгінгі күнде судың құрамы нормалық мөлшерде.
