Теміртауда жол сапасы сын көтермейді
Теміртауда жол сапасы сын көтермейді. Тұрғындардың айтуынша, көктемде еріген қар суынан көше жолдарының басым бөлігі бүлінген. Көлік жүргізушілеріне «Металлургтер» даңғылымен жүрудің өзі үлкен мәселеге айналған. Жол азабын тартқан халық қала әкімдігінің жағдайды жіті бақылауға алуын сұрайды.
Бұл Теміртаудың орталық жолы. Ой-тесігі көп басқа көшені айтпағанда, «Металлургтер» даңғылының қазіргі күйі өте нашар. Көпшілік жолда әр жарты метр сайын шұңқыр кездесетінін айтып, шағымданды.
Шаһар билігі мәселемен хабардар. Әкімдік өкілі Ринат Қыдырбековтің айтуынша, көшелерде суағарлардың дені тозған. Соның салдарынан еріген қар суы асфальтқа жайылып, мерзімінен бұрын тозуына әсер еткен. «Кәріз жүйесіне бірден құйылуы үшін жуық арада суағарларды жолдардың шеткі бөлігіне көшіреміз. «Металлургтер» даңғылын күрделі жөндеу жылдың соңына дейін аяқталады»,– дейді ол.
Ринат Қыдырбеков, Теміртау қаласы әкімінің орынбасары:
-Екі участокта асфальт салу жұмыстары былтыр аяқтаған болатынбыз. Биыл қалған төрт участогына ЩМА салу жұмыстары жалғасатын болады. Жалпы биылға жергілікті бюджеттен бұл жоба бойынша 5 млрд теңге қаражат қарастырылған. Жалпы құны 10 млрд-ты құрайды. Қыркүйек-қараша айларында бұл жұмысты бітіреміз деп жоспарлап отырмыз.
Айта кетсек, Теміртауда автомобиль жолдарының жалпы ұзындығы 720 шақырым. Соның ішінде 23 көше жолына биыл орташа жөндеу жасалуы тиіс. Осы мақсатта жергілікті бюджеттен 5 млрд теңге бөлінді. Сондай-ақ қалаішілік жолдардың 14 шақырымын қалпына келтіру жоспарланған.
Талғат Исламұлы, Лиана Жамлиханова, Сайран Ақамбаев, Аман Хамит
