Қызыл жалын 350 гектарға жуық аумақты шарпыған. Мамандар өрттің тұтануына қураған шөп пен адами факторлар себеп болуы мүмкін дейді. Құтқарушылар мен полицейлерден жасақталған арнайы топ тұрғындарға тілсіз жаудың алдын алу амалдарын түсіндіріп жатыр.
Абзал Азаматұлы, тілші:
-Иә, аймақта дала өрті жиілеп кетті. Алыс аудан, ауылдарды айтпағанда облыс орталығының іргесіндегі жағдай осындай. Құрғақ шөп қызыл жалынға оранып жатыр.
Бұл қала шетіндегі саяжай маңы. Қызыл жалынның жылдамдағына көз ілеспейді. Бірақ құтқарушылар тілсіз жауды қалаға жеткізбей сөндіріп үлгерді.
Ерсайын Қойшыбаев, облыстық ТЖД ресми өкілі:
-Бұл өрт саяжайлар мен жеке сектордағы үйлерге жеткен жоқ. Бірден сөндірдік. Қалаға жақын болғанымен ешқандай қауіп жоқ деп айтуға болады. Қазір бізде арнайы кезекшілік құрылып, құтқарушылар күн-түні сақадай сай отырады.
Дала өртін сөндіру құтқарушыларға да оңай болмай тұр. Әсіресе, желді күні өрт өрши түседі. Ал батпақты аймақта техника қозғалысы қиындайды. «Өрттің жиілеуіне тұрғындардың салғырттығы себеп»,– дейді жауаптылар.
-Дала өртінің өршуіне бірнеше себеп бар. Мәселен, жол бойындағы өрт көбінесе тұрғындардың салғырттығынан тұтанады. Өйткені темекі қалдықтарын тастайды. Ал алқаптағы тілсіз жауға ауыл шаруашылығы техникаларының ұшқыны себеп болуы мүмкін. Сондықтан біз тұрғындармен үнемі түсіндірме жұмыстарын жүргіземіз.
Орман шаруашылықтары дала өртіне дайын болуы шарт. Инспекторлар осындай талап қойып отыр. Себебі тілсіз жау айтып келмейді. Бірақ жұмысына салғырт қарайтындар да бар. Дайындықтарын қамдамаған сондай бірнеше мекеме басшысы жазаға тартылды.
Арман Тұрымбаев, орман шаруашылығы және жануарлар дүниесі аумақтық инспекциясы басшысының орынбасары:
-Өрт қауіпсіздігі талаптарын сақтамағаны үшін 11-і орман шаруашылығы мекемесіне және 6 лауазымды тұлғаға айыппұл салынды. Айыппұлдың жалып көлемі 1 млн 710 мың теңге.
Биылдан бастап өңірдегі бес орман шаруашылығында өртті ерте анықтайтын жаңа жүйе іске қосылды. Сондай-ақ таяуда мобильді топтар құрылып, орман алқаптарын қадағалау жұмыстары күшейтіледі.
Абзал Азаматұлы, Виктор Полянный
