Әрі жыршы, әрі ақын, әрі батыр Қостанайлық абыз ақсақал Қасымхан Алдабергеновтің есімі көзі қарақты талай қазаққа жақсы таныс. Талай айтыста топ жарып, жыр-термесімен жұртты ұйытқан өнер иесі, соғыста әуе десанты болған.
Қасымхан Алдабергенов 1943 жылы соғысқа аттанған. Ол сол кезде небәрі 17 жаста еді. Бозбала оқу-жаттығу кезінде алғырлығымен көзге түсіп, әуе десанты гвардиясына қабылданады. Талай рет жаумен бетпе-бет келіп айқасқан. «Сол сәтте рухтың мықтылығы, бірлігіміздің беріктігі айқын көрініс тапты»,– дейді соғыс ардагері.
Қасымхан Алдабергенов, соғыс ардагері:
-Есі кірген жастан бастап, еңкейген шалға дейін бәрінің де мақсаты бір ғана, ол - жеңіске жету. Сол жеңіске жетудің жолында олар кәдімгі жан аямай, майданға көмектесті. Мынау достық деген, сен орыссың ба, қазақсың ба бәрібір, бір әкеден, бір шешеден туған үлкен бір отбасы, әулет сияқты болады.
Бала кезінен құймақұлақ жыршы, ақындардың батасын алған өнерлі жан бейбіт өмірде қазақтың қара домбырасын жанына серік етті. Талай айтыста аламанға түсіп, дүбірлі додаларда топ жарды.
Қасымхан атаның шығармашылығы санқырлы. Жыраулық, айтыскерлігінен бөлек, қара өлең жазудың шебері, қаламы жүйрік журналистігі тағы бар.
-Жердің иесі халық. Сол жердің бүкіл байлығы, үстіндегі байлығы, астындағы байлағының бәрі халықтыкі ғой. Соған жаңағыдай мал өсіру керек. Фабрика, зауыт салу керек. Өзіміз өндіруіміз керек. Киім-кешек болсын, техника болсын. Өзіміз, өзіміздің жастарымыз еңбек ету керек.
Қасымхан ата Жеңістің 80 жылдығы құрметіне Астанада өтетін әскери парадқа шақырту алыпты. Қазір қарт жауынгер сол сапарға дайындалып жатыр.
Мағауия Қалиев, Ермек Мұхамедияров
