Алматы облысының Жамбыл ауданында 30-дан астам ұлт пен ұлыс өкілі тату-тәтті тұрып жатыр. Аудан орталығы Ұзынағашта ұлтаралық татулықты нығайту мақсатында төрт этномәдени бірлестік құрылған. Ассамблея мүшелері Қазақстанды туған Отанымыз дейді.
Зинаида Богданованың әкесі 1942 жылы 12 жасында Сталинградтан Мойынқұмға қоныс аударған. Кеңес үкіметінің басшылығы Сталинград түбіндегі шайқастың алдында кәмелет жасына толмаған 1800 баланы шойынжолмен Орталық Азия елдеріне аттандырды. Кеңпейіл қазақ халқы оларды құшақ жая қарсы алып, үйді-үйге бөліп, жылы-жұмсағын алдарына тосты. «Әкем «қонақжай қазақ халқына мәңгі-бақи қарыздармыз» дегенді үнемі айтып отыратын», - дейді Зинаида Богданова.
Зинаида Богданова, ҚХА мүшесі:
-Сталинградтың балалары келді, өз балаларыңдай қылып тәрбиелеңдер деп, менің әкемді Дүйсенәлі деген ата алып, өз баласындай тәрбиелеген. Қазақстан халқы Ассамблеясы мен үшін өте дәрежелі, үлкен ұғымды ұйым.
Ал ұйғыр ұлтының өкілі Гүлнисам Тұражанқызының ата-бабасы Қазақстанға Қашқариядан көшіп келген. Гүлнисамның мамандығы – педагог. Қазақ тілі мен әдебиеті, ағылшын тілі пәнінің мұғалімі. Ол Райымбек ауданының Сүмбе ауылында туып-өскен. Гүлнисам Тұражанқызы, ҚХА мүшесі:
-Менің нағашы апам «қазақтар өте бауырмал халық» дейді. Нағашы апамның қазір де көзі тірі. Қазақтармен біз өте етене араласып кеткенбіз. Олар көмбеге нан пісіреді, біз тандырға нан жабамыз. Нандарымызды алмастырып жейтінбіз, ойнайтынбыз.
Смайылжан Иминов, ҚХА мүшесі:
-Мен үшін Қазақстан халқы бұл бір халық. Біз әртүрлі этнос. Біреуіміз қазақ, біреуіміз ұйғыр, біреу орыс, неміс, татар. Біз бір халықпыз. Қазақстан Республикасының халқы.
Жамбыл ауданында 170 мыңнан астам халық тұрса, соның 24 мыңға жуығы өзге ұлт өкілі. «Біз бір бірімізге түсіністікпен қарап, бірлігімізді нығайтып, ынтымағымызды одан ары арттыруымыз керек», - дейді Ассамблея мүшелері.
Ардақ Айбарұлы, Аят Дүйсенбаев, Аманжол Жөңкешов
