2040 жылға қарай еліміздегі су ресурсының тапшылығы 50%-ға жетуі мүмкін.
Депутат Сәкен Арубаев осылай деп Үкімет басшысына депутаттық сауал жолдады. Айтуынша, су қауіпсіздігін нығайту үшін шұғыл шаралар қабылдау қажет. Себебі салада жұмыс атқаратын мамандардың 70 пайызының тиісті білімі жоқ. Жыл сайын бұл бағытта 200 жоғары, 100 техникалық және кәсіптік білімі бар мамандар дайындалады. Бірақ олардың тек бестен бірі ғана өз мамандығымен жұмысқа орналасады,- дейді депутат.
Сәкен Арубаев, ҚР Парламенті Сенатының депутаты:
- Университетке өткен жылы су саласына берілген 250 гранттың 150-і ғана игерілген. Себебі жастардың су саласына деген тартымдылығы өте төмен. Мемлекеттік тапсырыс пен гранттар санын көбейтумен шектелмей, су шаруашылығы мамандықтарына қызығушылықты арттыру, мамандарды қайта даярлау және оларды өңірлерде жұмысқа орналастыру, жалақысын көтеру бойынша жүйелі шаралар қабылдаған жөн.
