Атырау облысы Қызылқоға ауданын бойлай ағатын Ойыл өзенінде су деңгейі төмендеп келеді. 3 жыл қатарынан арнасынан асқан өзен былтыр ауданның Индер-Қарабау-Миялы күрежолын шайып кеткен болатын. Сондықтан биыл жергілікті билік ауылдарды қоршап, 54 шақырым бөгет тұрғызып, Ойыл арнасын тереңдету жұмыстарын қолға алған.
Бастауын Ақтөбе облысынан алатын Ойыл өзенінде биыл су деңгейі бірқалыпты. 28 ақпаннан бүгінге дейін Ералы су торабы арқылы 2 млн 300 мың текше метр су ағып өтіпті. Негізгі қауіпті кезең наурыздың 27-30 аралығында еді. Қазір жағдай тұрақты.
Бақтыбек Төлегенов, аудандық ТЖБ басшысы:
- Ойыл өзенінің деңгейі 5,62 метр болып отыр. 2 см түсуді көрсетіп отыр. Қазіргі ауданға қауіп жоқ десек те болады. қазір енді арнасымен ағып кейбір аласа жерлерден су шығып, жайылмаға жайылып жатыр.
Ойыл өзені Қызылқоға ауданының 9 округін бойлай ағады. Елді мекендерді тасқыннан қорғау мақсатында 54 шақырымнан астам бөгет соғылып, өзен арнасының 7 шақырымы тереңдетілді. Сондай-ақ аудандағы Ералы су торабы толықтай ашылды.
Қанат Әзмұқанов, Қызылқоға ауданының әкімі:
- Ералы гидроузелінің 6 қақпасының барлығы ашық тұр. Ол жерде 1,70 метрмен су ағып жатыр.Алдыңғы жылы 3 метрмен ақты, су үш бағытпен ағып жатыр. Жарыпшыққан барады, сосын Ойылдың өз арнасы бар, онан басқа Көздіқара деген үшеуіне де жақсы кетіп жатыр. Жайлымға да, шабындыққа да шығып, қолайлы болып жатыр.
Өтеулі Дүйсәлі, Миялы ауылының тұрғыны:
- Осы келіп жатқан суды біз енді ауыл шаруашылықты аудан болған соң жерді тиімді пайдалану жолдарын қарастырып жатырмыз. Бұған енді барлық ауыл азаматтары да атсалысып жатыр. Қазір Миялының көліне су шығару жұмысын жүріп жатыр.
Көктемгі су тасқынынан қорғану жұмыстарына 300-дей адам мен 75 техника тартылған болатын. Нәтижесінде асау өзен біртіндеп арнасына түсіп келеді. Былтыр басталған 100 шақырымдық түп тереңдету жұмысы биыл да жалғасады. Бұл мақсатқа 1 млрд теңге қаражат қаралып отыр.
Арыстанбек Кенже, Айбек Байзақов, Жандос Рахметуллин
