Жыл басынан бері Екінші дүниежүзілік соғысқа қатысқан 45 адамның сүйегі елге жеткізілді. «Мемориалдық аймақ» жасағы іздестіру жұмыстарын Германия, Латвия, Литвия, Беларусь, Еуропа және Санкт-Петербург маңындағы Синяв батпақтарынан бастапты.
Соғыста қаза болған 20 батырдың ұрпақтарына арнайы медаль табысталды. Жиынға Екінші дүниежүзілік соғысының майданында қаза болған қазақстандық жауынгерлердің тұқымы, ардагерлер және жас сарбаздар қатысты.
Сарапшылардың айтуынша, жастар арасында ерлік танытқан қазақстандық жауынгерлерді жиі ұлықтау қажет. Бұл – өскелең ұрпаққа әскери-патриоттық тәрбие берудің маңызды құралы.
Асхат Налшыбек, «Жас сарбаз» балалар мен жасөспірімдер әскери-патриоттық қозғалысы» республикалық қоғамдық бірлестігінің төрағасы:
- Екінші дүниежүзілік соғыс жылдары Қазақстан аймағынан 1 млн 200 мыңға жуық қазақстандық жауынгерлер аттанған. Оның ішінде 250-300 мыңға жуық жауынгерлер ес-түссіз жоғалған болатын. Бауыржан Момышұлы атамыздың «Ешкім іштен батыр болып тумайды» деген керемет сөзі бар. Батырлық өскен ортадан, көрген тәрбиеден қалыптасады. Сол себепті жас ұрпақтарымызда бүгінгі шараға қатысуы маңызды рөл атқарады.
