Шығармашылық әлеуетті дамыту. Президент Ұлттық құрылтайда айтқан осы міндетті орындау үшін елордадағы «Техникалық және көркем шығармашылық орталығы» ашық есік күнін өткізді. Қазір мұнда оннан астам үйірме бар. Ал орталықтың өзі жұмыс істегеніне 20 жыл болған. Осы уақыт ішінде орталықта 80 мыңнан астам бала тәлім алыпты. Жыл сайынғы келушілер саны 4 мыңнан асады.
Балаларға вокал, би, домбыра тарту, бокс, сәндік қолданбалы өнер, басқа да бағыттар бойынша бағдарламалар көрсетілді. Көпшіліктің ерекше ықыласына бөленген «Қыз қылығымен» атты шеберлік сағатында ұлттық тәрбиеге қатысты құнды мәліметтер ортаға салынды. Сонымен қатар жасанды интеллект пен домбыра және робот жасау үйірмесінің шәкірттері өздері жасаған бұйымдарын таныстырды. Мұнда 6 мен 18 жас аралығындағы балалар қабылданады.
Қанағат Шарахметов, «Техникалық және көркем шығармашылық орталығының» директоры:
- Бізді табу үшін mindal.kz деген платформа бар. Қанша бала бар, қанша бос орын бары соның ішінде көрсетіледі де, әр ата-ана өзінің баласын тіркеуге мүмкіндігі бар. Бүл жүйенің ерекшелігі – тегін.
