Абай облысында Президент бастамасымен қолға алынған «Таза Қазақстан» бағдарламасы аясында жалпыөңірлік сенбілік басталады. Бұл туралы аймақ басшысы Берік Уәли тұрғындарға үндеу жасап, игі іске белсене қатысуға шақырды. Тазалық сақтау шарасы бір реттік акция емес, жыл бойы жалғасатын болады. Себебі биыл өңір ұлы Абайдың 180 жылдығымен қатар көптеген маңызды жобаларды жүзеге асыруды көздеп отыр.
Абай облысы тарихы терең, табиғаты көркем өңір. Есімін иеленген ұлы тұлғадан өзге талай Алаш арыстарының ізі қалды. Әрі облыс тоғыз жолдың торабында тұр. Сондықтан аймақтың таза болуы баса мән берілетін маңызды істің қатарында. Тұрғындарға үндеу жариялаған облыс әкімі бұл бұл өңірде қалыптасуы тиіс үлкен мәдениет екенін атап өтіп, игі іске барлық ұйымдар мен кәсіпорын және білім ұяларын атсалысуға шақырды. Берік Уәли, Абай облысының әкімі:
- Биыл аймағымыз атын иеленген ұлы Абайдың 180 жылдығы. Оны өздеріңіз жақсы білесіздер. Президентіміз айтқандай, бұл мерейтойды лайықты деңгейде атап өтуіміз керек. Біз бір қолдың саласындай, бір үйдің баласындай бірігіп, бұл шараны жақсы атқаруға тиіспіз. Себебі біз еліміздің түкпір-түкпірінен келетін қонақтарға көркем де, таза қаламызды ұялмай көрсете алуымыз керек. Еліміздің мегаполистері Астана, Алматы, Шымкент сияқты ірі қалалардан үлгі алуымыз керек.
Бастама аясында арнайы байқау жарияланады. Тазалық жанашырлары «Үздік аудан», «үздік ауыл», «үздік аула», «үздік университет», «үздік көше» секілді бірнеше номинация бойынша марапатталады. Жеңімпаздарға қомақты сыйлықтар бар. Өңір басшысының бастамасы тұрғындар тарапынан қолдау тапты.
Мерей Қарт, ақын, Абай кітапханасының басшысы:
-Көңілі кірлемеген адамның санасында артық қоқыс жоқ, адамның ауласы да таза тұрады, мекемесі де таза тұрады, іші жарқырап тұрады деп ойлаймын. Бұл тамаша бастама, тамаша ұсыныс. Оны әдетке айналдыру керек деп ойлаймын.
Қайрат Сабырбаев, облыстық тарихи-өлкетану музейінің директоры:
-Біз өз-өзімізді осылай қамшылауымыз керек. Басқа біреулерді кешке дейін мысал қылып айтамыз. Ал неге біз солардан тазалық тұрғыда да тереземіз тең тұрмасқа?! Қыстан шығып, жазға да жадырап жеттік. Сол жадыраған жазымыз жайқалып тұрсын десек, сенбілікке белсене қатысайық.
Ал облыста биыл 400 шақырым жол жөнделіп, 223 шақырым жол қайта жаңғыртылады. Семейде жүздеген аялдама қойылып, жаңа автобустар қала көшелеріне шығады. Шаһар жолдарын тазалау үшін мердігер компаниялар қазірдің өзінде 10 арнайы техника алған. Алдағы уақытта да олардың саны көбеймек.
Әнуарбек Мырзатайұлы
