Түркістан облысында Екінші дүниежүзілік соғысқа қатысқан 8 ардагер қалды. Отан үшін от кешіп, жеңісті жақындатқан майдангерлер қатары жыл санап сиреп барады. Соғыс жылдары өңірден 140 мыңнан астам сарбаз майданға аттанса, солардың жарысы ғана елге аман оралған.
102 жастағы Әкімбай Жұмабаев 1923 жылы 15 қаңтарда Ақпарақ ауылында дүниеге келген. 18 жасында әскер қатарына шақырылып, 1942 жылы 122 атқыштар полкінің құрамында майданға аттанды. Сталинград түбіндегі кескілескен ұрысқа қатысып, онда барлаушылар тобында болды. 1943 жылы аяғынан жараланып, елге оралды. Содан бастап зейнеткерлікке шыққанға дейін ауыл шаруашылығы саласын өркендетуге бар күш-жігерін жұмсады.
Әкімбай Жұмабаев, соғыс ардагері:
- Мен осы колхозда тракторға шөп бастым. Трактористерге бригадир болдым. Көп жұмыс істедім. Қазіргі жастар істемейді ондайды.
Ғасыр жасаған қарияның денсаулығы жақсы болғанымен, көп нәрсені ұмытып қалған. Сұрапыл соғыс жылдары туралы ашылып айта бермейді. Қарт майдангер соғыста көрсеткен ерлігі үшін 2-ші дәрежелі «Отан соғысы» ордені мен «Германияны жеңгені үшін» медальімен марапатталған. Жеңіс мерекесін жыл сайын өз үйінде, бала-шағасы мен ағайын-туыстың ортасында қарсы алады.
Сәдуақас Жұмабаев, соғыс ардагерінің ұлы:
- Әкеміз Құдайға шүкір, өз аяғымен кіріп-шығады. Ешкімге зияны жоқ. Әкемізбен мақтанамыз. Дәрігерлер келіп тұрады. Аудан, ауыл әкімдері хабар алып тұрады.
Бүгінде қарт-майдангер 4 ұл, 2 қызынан 21 немере, 60 шөбере, 2 шөпшек сүйіп отыр. Ұрпақтарына бейбіт күннің бағасын біліңдер, - дейді. Әрдайым елдің амандығын тілеп, жастарға батасын беріп отырады.
- Е, Құдайым оңдасын, жаманшылық болмасын. Ел-жұртымыз аман болып, бейбітшілік заман болсын. Әумин!
Соғысқа Қазығұрт ауданынан 8 мыңға жуық сарбаз аттанып, көбі майдан даласында қаза тапқан. Ауданнан екі бірдей Кеңес одағының батыры шықты. Бірі Сабыр Рахымов болса, екіншісі Қарақозы Әбдалиев. Бүгінде жерлестері батыр бабаларының ерлігін мақтан етеді.
Жандос Жұмабек, Ерболат Әбіш
