Фёдор Щеглов қан майданға 17 жасында аттанып, Германиядағы шайқастарға қатысқан.
Фёдор Щегловтың әуелі әкесі мен екі ағасы майданға аттанды. Кейін өзі де қолына қару алды. Ол 371-атқыштар дивизиясы қатарына қабылданған.
Фёдор Щеглов, соғыс ардагері:
- Мені соғысқа қараша айының қара суығында алып кетті. Қар жауып, күн аяз болды. Петропавлдан бір топ жігіт болып Уфадан 37 шақырым жердегі «Алкина-2» станциясына тоқтадық. Осылай майданның ортасына түстік. Енді ондайды көрсетпесін. Бейбіт күн болсын.
Қарт майдангер Жеңіс күнінен кейін Жапонияға қарсы соғысты. Үйіне аман-есен оралған ол құрылыс саласында еңбек етті. Биыл 98 жасқа келеді. Бірақ әлі тың. Қимылы да ширақ.
Надежда Гордеева, соғыс ардагерінің қызы:
- Біздің отбасыда Жеңіс күні – ең қастерлі мереке. Мамырдың 9-ы жақындарымызбен жиналып, әкемізге құтты болсын айтамыз. Ол соғыс жайлы көп айтқысы келмейді. Тек немерелері ес білгенде бірен–саран естелігімен бөліскені бар.
Солтүстік Қазақстан облысында 3 соғыс ардагері қалды. Үшеуі де Петропавлда тұрады. Мереке қарсаңында оларға 5 млн теңгеден беріледі.
Айдарбек Айтмұхамбетұлы, Қуаныш Қазбеков
