Премьер-министр Олжас Бектенов Алматыға жұмыс сапары барысында Kaspi.kz-тегі Magnum онлайн-супермаркетінің логистикалық орталығымен және ритейл саласындағы жаңа инфрақұрылыммен танысты.
Қазақстандық Kaspi.kz инновациялық компаниясының басшысы әрі негізін қалаушылардың бірі Михаил Ломтадзе электронды коммерцияны дамытудағы жетістіктері туралы баяндады. Сондай-ақ жаңа логистикалық орталықтардың ашылатыны туралы хабарлады.
Kaspi.kz-тегі Magnum онлайн-супермаркетінің Алматыдағы ең ірі логистикалық орталығында 10 мың түрлі тауар ұсынылған. Оның жартысынан астамы – қазақстандық өнімдер.
Михаил Ломтадзе, Kaspi.kz басшысы және негізін қалаушылардың бірі:
- Біз ерекше мақтан ететін бір көрсеткіш – сатылымның 50 пайызы қазақстандық өнімдерден тұрады. Яғни біз Қазақстанда өндірілген тауарларды онлайн-супермаркет арқылы сатуды мақсатты түрде дамытып жатырмыз.
2025 жылы онлайн супермаркетке 800 мыңнан астам қазақстандық 5,3 миллион рет тапсырыс беріп, тегін жеткізу қызметін пайдаланған.
- Онлайн супермаркетті біз шамамен 3-4 жыл бұрын дамыта бастадық. Бұл Kaspi.kz қосымшасына енгізілген толықтай онлайн қызмет. Жүз пайыз онлайн жұмыс істейді. Тауарларды онлайн таңдап, 3 сағат ішінде алуға, пікір қалдыруға болады. Оны пайдаланатын әр 10 адамның 9-ы өте жақсы деп бағалайды. Яғни адамдар өте риза. Тек Алматының өзінде онлайн супермаркетті шамамен 200 мың отбасы қолданады.
Kaspi.kz компаниясының онлайн-супермаркетке салған инвестициясы 53 миллиард теңгеден асады. 4500 жұмыс орны құрылды, 5 миллиард теңге салық төленді. Сондай-ақ Алматы, Астана және Шымкентте Magnum-ның алты логистикалық орталығы салынды. 2025 жылы Алматы, Астана, Қарағанды және Ақтөбеде тағы төрт орталық ашу жоспарланған.
Сондай-ақ Михаил Ломтадзе Үкімет басшысына цифрлық қызметтерді ұсынуға арналған екі заманауи дата-орталық — Kaspi Cloud жобасы туралы айтты. 5 МВт қуаты бар 250 орын секундына 10 мың транзакция жүргізе алады. Бұл жобаға Kaspi.kz тарапынан 14 миллиард теңге инвестиция салынған.
Аршын Кемелжан
