Қазақстанда жұмысшы мамандықтарына деген сұраныс 40 пайыздан асты. «Сол себепті білікті кадр даярлауға назар аударған жөн», - деді өңір тұрғындарымен кездескен Мәжіліс төрағасы Ерлан Қошанов.
Делегация алдымен Нұра ауданындағы Болат Әбдікәрімов атындағы көпсалалы колледждің жұмысымен танысты. Мұнда агроөнеркәсіп, құрылыс және өндіріс саласына мамандар даярланады. Мәжіліс спикері Жұмысшы мамандықтар жылында колледждер елге қажетті мамандар даярлау ісіне ден қойғанын жеткізді. Сондай-ақ сала мамандарына арналған тұрғын үй ипотекалық бағдарламасы іске қосылғанын және зиянды еңбек жағдайында жұмыс істейтіндерге зейнетке ерте шығу мүмкіндігі қарастырылғанын атап өтті.
Ерлан Қошанов, ҚР Парламенті Мәжілісінің төрағасы:
- Бүгінгі таңда Мемлекет басшысы ерекше атап айтып жүрген саясаттың басты мақсаты – еңбек адамын құрметтеу. Осы бағыттың жалғасы ретінде биылғы жылды «Жұмысшы мамандықтар жылы» деп жариялады. Ал жұмысшы мамандықтарын дайындайтын кім? Әрине, біздің колледждер бірінші кезекте. Сіздердің еңбектеріңіз өте маңызды.Балалардың бойына алғашқы мамандықты сүюді, еңбекті құрметтеуді және адами құндылықтарды сіңіру – барлығы сіздердің бүгінгі жасап жатқан еңбектеріңіздің нәтижесі. Сіздер балаларға осыны жеткізіп, бойларына сіңіріп жатсыздар.
Нұра ауданда ауыл шаруашылығы да қарқынды дамып келеді. Мәжіліс депутаттары сүт фермасының жұмысымен де танысты. Кәсіпорында 1100 голштин-фриз тұқымды сауынды сиыр бар. Ферма тәулігіне орта есеппен 27 тонна, жылына 10 мың тоннаға дейін сүт өндіруді жоспарлап отыр.
Бұдан соң депутаттар медицина қызметкерлеріне арналған көппәтерлі тұрғын үй кешенінің күрделі жөндеу жұмыстарын тексерді.
