Алматы облысындағы Көлсай көлдеріне сегіз айда 457 мың турист келді. Бұл өткен жылдың осы кезеңімен салыстырғанда екі есе көп. Демалушылардың үштен бір бөлігі – шетелдік азаматтар. Бір айта кетерлігі, тұмса табиғатты тамашалауға Үндістан, Біріккен Араб Әмірліктері мен көршілес Ресей және Қытайдан саяхатшылар жиі барады екен. Жұмыс күндері көркі көз тартатын Көлсайдай көрікті мекенге екі мыңға жуық, ал демалыс күндері алты мыңдай саяхатшы ат басын тірейді. Табиғи парк аумағында 9 туристік маршрут бар. Демалушылар әсіресе төменгі Көлсай мен Қайыңдыны аралағанды ұнатады. ЮНЕСКО-ның бүкіләлемдік биосфералық резерваттар жүйесіне енген ұлттық паркті абаттандыру жұмыстарына биыл 68 млн теңге бөлінген.
Руслан Иманбай, «Көлсай көлдері» МҰТП экологиялық ағарту және туризм бөлімінің басшысы:
-Жалпы мына біздегі төменгі Көлсай мен жоғарғы Көлсайға жаяу жүргіншілерге арналған жолды жасау бойынша 30 миллион қаражат бөлінген. Одан кейін төменгі Көлсайға түсуге 26 миллион теңге қаражат бөлініп отыр, жаяу жүргіншілерге арналған жолды жасайын деп отырмыз. Осы жылдың аяғына дейін жасаймыз.
Лин Нгу, саяхатшы:
- Біз Вьетнамнан келдік. Ұлым Қазақстанда бір айлық тәжірибеден өтіп жатыр. Көлсайды көрсем деп екі жыл бойы армандады. Міне, енді сол арманы орындалғанына қуанып жүр. Табиғаты өте керемет жер екен. Адамдары да, инфрақұрылымы да көңілден шықты.
