Қазақ киносының көркін көркемдеген көліктер қара темірге сатылып кетуі мүмкін

Кейбірінің зауыттан шыққанына бір ғасырға жуықтаған көліктер қазір шаң басып тұр.

Алматы облысының Абай ауылында тұратын Мейірхан Кәрібаев жиырма жылдан бері ретро көліктерді жинаумен айналысады. Бүгінде оның ауласында әртүрлі санаттағы 25 автомобиль бар. Ішіндегі ең ескісі – 1936 жылы Италияда құрастырылған «Фиат» машинасы. Одан кейінгісі – 1942 жылғы «Газ-67» әскери көлігі. Ұлы Отан Соғысынан аман қалған техниканы ардагердің отбасын әрең көндіріп, 5 мың долларға сатып алған. Бұл техника талай рет соғыс туралы фильмдерде пайдаланылған.

Мейірхан Кәрібаев, ретро көлік жинаушы:

- Бұл машинаны мен 10 жыл жүріп бір адамдардан сатып алғам. Бұл соғыста бір командирді құтқарған. Ол сыйлық ретінде жүргізушісіне табыстаған. Ол шал немересіне берген. «Мен киноға қоямын, халық көрсін» дегеннен кейін ғана маған сатты.

Мұнда «Газ-01», «Газ-51» жүк көліктері, Кеңес Одағындағы партия хатшылары мінген «Зим» мен «Волга» және одан басқа да жеңіл көліктер бар. Мейірхан Кәрібаевтың ретро көліктерін «Балалық шағымның аспаны», «Анаға апарар жол», «Балуан Шолақ» сынды тарихи кинолардың көбінен көруге болады. «Қазір шаң басып тұрғанымен, барлығы жүріске жарамды», – дейді.

Өмірінің жиырма жылын ретро көліктер жинауға арнаған Мейірхан Кәрібаев бүгінде жәдігерлерді сақтауға ақшаның қолбайлау болып тұрғанын айтады. «Мұражай ашсам» деген арманы да қаражаттың тапшылығынан жүзеге аспай тұр. Оның ендігі бір мақсаты – қолдаушылар тауып, ел тәуелсіздігінің 30 жылдығына арналған ретро көліктер шеруін ұйымдастыру.

Мейірхан Кәрібаев, ретро көлік жинаушы:

- Соңғы уақытта машинаны сақтауда сәл қиналып жатырмыз. Егер де жағдай қиын болып, кино болмай жатса, бұлардың барлығын сатуға мәжбүрміз.

Мейірханның иелігінде 1945 жылғы паровоз бен 6 вагоны бар. Ауыр техника тек түсірілім кезінде қолданылады. Коллекция жинаушы отарбаны Шығыс Қазақстан облысындағы Шемонаиха қаласынан, вагондарын Қызылордадан сатып алыпты. «Тарихи мұраны сақтауға үкіметтен қолдау болмаса, қара темір ретінде сатудан басқа амал жоқ», – дейді.

Авторлары: Аршын Кемелжан, Кенже Амраев