Астанада биологиядан халықаралық олимпиада өтіп жатыр

Елордада биологиядан халықаралық олимпиада өтіп жатыр. Бірінші күні шетелден келген оқушылар қазақ мәдениетімен танысса, ертең тәжірибелік сынақ басталады. Жауапты мамандардың айтуынша, жарысқа қатысушылардың арасынан екі теориялық және төрт практикалық кезеңдер бойынша үздіктерді анықтайды. Елімізде алғаш рет өткізіліп отырған білім додасы осыдан 34 жыл бұрын тек 6 мемлекет арасында ұйымдастырылған. Бүгінгі білім бәйгесіне әлемнің 81 елінен 300-ден аса оқушы қатысып, бақ сынап жатыр. Олимпиаданың Астанада өткізілуіне басты себеп - біздің оқушылардың түрлі білім бәсекесіндегі жоғары жетістіктері. Бұған дейінгі олимпиадада Қазақстан командасы екі алтын, 20 күміс, 54 қола медальды жеңіп алған. 

Нұртөре Төреханұлы, олимпиадаға қатысушы:
-International Biology олимпиадасына 5 жылдан бері дайындалып келемін. 5 жылдың еңбегімнің арқасында осы жылы Халықаралық олимпиадаға өте алдым. Өте қуаныштымын. Әр елдің оқушысымен танысып, басқа елдермен қарым-қатынас жасауға өте үлкен мүмкіндік беруде.

Бауыржан Смайылов, Қазақстан командасының жетекшісі:
-Қазақстан командасының құрамында 6 адам бар. Төрт оқушы, екі жетекші. Біздің оқушылар түрлі білім сайыстарында озық болып, республикалық додаларда жеңіске жетіп жүргендер. Бұған дейін Алматы қаласында Әл-Фараби атындағы Қазақ ұлттық университетінде арнайы дайындықтан өтті. Сайыстардың барлығына сақадай сай дайын.