Қ. Тоқаев: бейбіт жиын өткізу – азаматтардың конституциялық құқығы

Бұл – олардың конституциялық құқығы. Кеше Мемлекет басшысы Қасым-Жомарт Тоқаев Бас прокуратураның басшылық құрамымен өткізген кеңесте осылай деген болатын. Президенттің пікірінше, бұл – қоғамды демократияландыру жолындағы өте маңызды қадам. Сондықтан: «Бұл саясатты біздің қоғамда ғана емес, шетелдерде де түсіндіруіміз керек», – деді ол. «Жиын өткізгісі келетіндер жаңа заңға бағынуға міндетті», – деп қосты Президент.

Қасым-Жомарт Тоқаев, Қазақстан Республикасының Президенті:

- Былтырдан бастап Қазақстанда бейбіт жиындар өткізу туралы мүлде жаңа заң күшіне енді. Егер бұрын қолданыста болған заңда рұқсат алу процедурасы болса, жаңа заңда митинг өткізу туралы хабарласа жеткілікті. Сонымен қатар ірі қалалардың орталықтарында бейбіт жиындарға, оның ішінде наразылық акцияларын өткізуге арнайы орындар белгіленген. Бұл – біздің қоғамды демократияландыру жолындағы өте маңызды қадам. Бұл саясатты біздің қоғамда ғана емес, шетелдерде де түсіндіруіміз керек. Жиын өткізгісі келетіндер жаңа заңға бағынуға міндетті. Азаматтардың билікке қатысты өз ойын білдіру, сыни пікір айту құқынан ешкім айыра алмайды. Бұл олардың конституциялық құқығы және ол қатаң түрде заң аясында орындалуы керек.