Бұл туралы қазақстандық Жиһаз жасаушылар мен ағаш өңдеушілер қауымдастығының 20 жылдық мерейтойында белгілі болды. Айта кетейік, бұл салада еліміз бойынша қазір 1300-ден астам кәсіпорын бар. Олар асхана, жатын бөлме, кеңсе, яғни сұранысқа қажетті барлық жиһазды жасайды. Мамандардың есебінше, отандық және импорттық тауарды қосқанда жыл сайын 140-150 млрд теңгенің өнімі сатылады. Демек, қомақты қаржы айналымы бар.
Қанат Ибраев, ҚР Жиһаз және ағаш өңдеу өнеркәсібі кәсіпорындары қауымдастығының президенті:
- Мемлекет қолдауымен Солтүстік пен Шығыс Қазақстан облысында жиһазға арналған тақтай шығаратын зауыт салынады деп жоспарлануда. Тиісті меморандумға қол қойдық. Шамамен 2-3 жылда алғашқы өнімді аламыз. Сол арқылы жиһаз жасаудағы отандық үлесіміз арта түсетін болады.
Қарлығаш Байбаченова, жиһаз жасау кәсіпорнының директоры:
- 1 шілдеден бастап мемлекеттік сатып алу аясында тек отандық өндірушілердің жиһазы алынатын болды. Осы қысқа аралықта менің кәсіпорнымның өндірістік қуаты 70% артты. Жұмысшылар саны 10-12 адамнан 30 адамға дейін ұлғайды.
