ЕО мен Парсы шығанағы елдері Таяу Шығыстағы қақтығысты тоқтатуға шақырды

Жаһанды алаңдатқан сын-қатердің бірі – Таяу Шығыстағы қақтығыстар. Жуырда Израиль әскері БҰҰ күштерінің позициясына шабуыл жасады. Бірақ Израильдің сыртқы істер министрі мұны кездейсоқтық деп отыр. Ал Дүниежүзілік денсаулық сақтау ұйымы Ливанда тырысқақ тарау қаупі жоғары екенін мәлімдеді. Еуроодақ пен Парсы шығанағы елдері Таяу Шығыстағы қақтығысты тоқтатуға шақырды.

Еуроодақ пен Парсы шығанағы елдері Таяу Шығыстағы қақтығысты тоқтатуға шақырды. Бұл туралы Брюссельде өткен Еуроодақ елдері мен Парсы шығанағында орналасқан араб мемлекеттерінің ынтымақтастық кеңесінің қорытындылары бойынша бірлескен Декларацияда айтылды.

Сондай-ақ олар БҰҰ Қауіпсіздік Кеңесінің 2735 қарарын толық орындауға шақырды. Тараптар Палестина халқының екі мемлекет туралы шешім арқылы өзін-өзі анықтау құқығын қолдайтынын мәлімдеді.

Урсула фон дер Ляйен, Еурокомиссия төрағасы:

- Барлық күш-жігерімізді салып, дипломатиялық жолмен шиеленісті тоқтатуға тырысуымыз керек.

Мұхаммед бин Абдуррахман бин Джассим Әл Тани, Қатар премьер-министрі:                                                                                                          

- Соңғы үш-төрт аптада ешқандай келіссөздер немесе өзара байланыс болған жоқ. Біз жай ғана үнсіздік шеңберінде жүріп келеміз. Бұл өкінішті.