Қарағанды облысында жаңа туған сәбилер скринингтен өтуде

Қазір облыста тұқым қуалайтын дертке шалдыққан 200-ден аса бала тіркелген. Олар арнайы есепке алынып, міндетті медициналық көмек алуда.

Диана Мендібаева – жақында екінші сәбиін дүниеге әкелген жас ана. Нәрестесін скринингтен өткізген. «Тұқымқуалаушы ауру түрлерін ерте анықтауға мүмкіндік беретін жоспарлы медициналық тексерістерге болашақ аналардың жауапкершілікпен қарауы қажет», – дейді ол.

Диана Мендібаева, қала тұрғыны:

- Скрининг туа пайда болған немесе хромосомалық түрде тұқым қуалайтын ауруларды және ішкі секреция жүйесінің ақауларын анықтауға мүмкіндік береді. Тексеріс арқылы аурулар өз уақытында анықталады. Бұл – баланың дұрыс дамуына көз жеткізетін анализ түрі.

Айта кету керек, соңғы екі жылда облыста 70 мыңға жуық нәресте медициналық тексерістен өткен. Нәтижесінде 13 жаңа туған балада фенилкетонурия ауруы анықталған. Тағы 208 сәби гипотериоз дертімен туған. Бұл балалар қауіп-қатері жоғары топқа енгізілген. Сондықтан оларды емдеу және тамақтандыру жүйесін дәрігерлер қатаң бақылауда ұстайды.

Жанат Завотпаева, Денсаулық сақтау басқармасының бас генетигі:

- Жұмыртқа, күріш, сүт өнімдерін алмастыратын өнімдер беріледі. Бала болғандықтан, түрлі тамақты сұрауы мүмкін. Алайда бұл топтағы балалар тек көкөніс пен жеміс-жидектерді ғана қабылдай алады.

Неонаталды скрининг пен емдеу бағдарламасы толығымен мемлекеттік қаражат есебінен қаржыландырылады. Ауру неғұрлым ерте анықталса, баланың қалыпты өмір сүруге деген мүмкіндігі соғұрлым ұлғаяды. Фенилкетонурия – ауыр асқынулардың алдын алып, тиімді терапиялық емі ойлап табылған алғашқы генетикалық ауру. Емі – қатаң диета. Бір баланың тамақ мәзіріне мемлекет тарапынан жылына 5 млн теңгеге жуық қаражат жұмсалады.

Авторлары: Айнұр Абдиева, Сайлау Игіліков