«Медеу» өңірлік табиғи паркімен шекаралас 288 гектар жер мемлекетке қайтарылды. Оның жекеменшікке заңсыз берілгендігі анықталды. Бұл туралы Алматы қаласының прокуратурасы хабарлады. Аумақ ауыл шаруашылығы мақсатындағы су қоры бар жер болғандықтан сатылмайды. Жетісу ауданы прокуратурасының талап-арызы бойынша жинақталған мәмілелерді сот жарамсыз деп тапты. Алматы қалалық сотының сот алқасы бірінші сатыдағы шешімді күшінде қалдырды. Қабылданған шаралар нәтижесінде құны 17 млрд теңгеден астам даулы жер телімдері мемлекет меншігіне қайтарылды.