Елорда көшелерін қар басты

Елорда көшелерін қар басты. Коммуналдық қызмет тәулік бойы жұмыс режиміне көшірілді. Себебі алдағы бір апта бойы толассыз қар жауады деген болжам бар. Тек өткен түннің өзінде қалаға 4 мм-ден астам жауын-шашын түскен. Салдарынан көшедегі көлік қозғалысы мен тұрғындардың жүрісі қиындады.

Астанаға бір түнде қалың қар түсуі тұрғындарды да, коммуналдық мекемелерді де абдыратып тастады. Әсіресе түске дейін көпқабатты үйлердің ауласында көлік түгілі адамның жүруі қиындады.

Сауалнама:

- Таңертең тазалаған жоқ мен тұрған жерді. Бірақ көшелерді тазалады, жақсы тазалады. 5-6 машина жүріп.

- Таңертең тұрғанда бәрі қар болып жатты. Одан кейін жүргенде кішкене ыңғайсыз болды. Себебі біз жақта қатты ауланы тазаламағандықтан, соның кесірінен автобусқа жүгіргеннен де кішкене ыңғайсыз болды.

- Оның бәрін түннен бастап тазаласа, жақсы болар еді. Таңертең жұмысқа кешігіп келдік сол себептерден. Пробкалар да көп болды, одан кейін жүргінші жолы тоже қар көп болды. Барлық демалыс күндері боран болды, күндіз-түні. Бірақ та соның өзінде де тазалауға болушы еді деп ойлаймын.

Қардан тазартуға жауапты ұйымдардың тәулік бойғы жұмыс режиміне көшірілген. Барлығы 22 бригада жұмылдырылыпты. Оның құрамында 1300 арнайы техника мен екі мыңнан астам адам бар. Әуелі жолдар, содан кейін әлеуметтік нысандарға да басымдық берілген. Коммуналдық қызметтегілер техника жеткілікті, ал адам күші қажет болса алдағы күндері қосымша алдыртамыз, - дейді. 

Олжабек Бейісов, коммуналдық шаруашылық басқармасы басшысының орынбасары:

- Ең алдымен біз біріншіден магистралдық жолдарды тазалаймыз. Одан кейін адамдар жүретін жол жүргінші тротуарларды, вокзал маңайын, сосын әлеуметтік нысандардың жандарын - сол жолдарды тазалаймыз. Техника жетеді100 пайыз қазіргі таңда. Екі ауысымдық тәулік бойғы режимге ауыстық. Коммуналдық мекемелердің барлығы жұмыс істеп жатыр.

Төтенше жағдайлар қызметінің мамандары құтқару қызметінің хабарламаларына салғырт қарамауды сұрайды. Ескертуді елемей, ұзақ жолға шығып кеткен жағдайда айыппұл да салынуы мүмкін,- дейді.

Әнуарбек Мырзатайұлы, тілші:

- Қазір Астанада қар шығару ісі қарқын алды. Бұл жұмысқа мердігер компаниялардың жүздеген техникасы жұмылдырылып жатыр. Тек өткен бір апта ішінен елорда аумағынан 57 мың текшеметр қар арнайы полигонға шығарылған. Ал алдағы күндерге арналған ауа райы болжамына келсек, ертең тынық болады. Одан кейін бірнеше күн қатарынан қайтадан толассыз қар жауады.

Әнуарбек Мырзатайұлы, Айбын Құсанбек