Түркістан қаласында байдарка мен каноэде есуден ересектер арасындағы Қазақстанның көктемгі чемпионаты басталды. Олимпиадалық стандарттарға сай ескек есу каналында жалауын көтерген бұл додада еліміздің 11 өңірінен жиналған 90-ға жуық үздік спортшы бақ сынайды.
Жарыстың салтанатты ашылу рәсіміне Азия байдарка және каноэде есу конфедерациясының бас хатшысы Джейк Ким арнайы қатысты. Ол үміткерлерге сәттілік тілеп, жарыстың маңыздылығын атап өтті. Чемпионаттың алғашқы күні спортшылар 200 метр қашықтықта өзара мықтыны анықтауға тырысты. Байрақты бәсеке 6 сәуірге дейін жалғасады.
Айта кетейік, бұл жарыс Азия біріншілігіне іріктеу саналады. Ел чемпиондары мамырдың 8-і мен 10-ы аралығында Қытайдың Наньчан қаласында өтетін Азия чемпионатында ел намысын қорғайды.
Дильфуза Ерғашқанова, жарысқа қатысушы:
- Мен ескек есу спортымен 9 жылдан бері айналысамын. Ескек есуден Азия чемпионатының жүлдегерімін. Бүгінгі жарысқа жақсы дайындықпен келдік. Бұйырса жеңіс тұғырынан көрініп, алдағы Азия чемпионатына барамыз деген жоспармыз бар.
Джейк Ким, Азия байдарка және каноэде есу конфедерациясының бас хатшысы:
- Қазақстанда су спорты қарқынды дамып келе жатыр. Бүгінгі ел чемпионаты соның бір көрінісі. Жарыс өтіп жатқан олимпиадалық стандартты ескек есу каналы халықаралық талаптарға сай салынған. Алдағы уақытта Түркістан су спорты ойындарының орталығына айналады деп сенемін. Қазір келесі жылғы Азия чемпионатын осы Түркістанда өткізу бойынша келіссөздер жүргізіліп жатыр.
Жәнібектің жекпе-жегі жақындап қалды
Кәсіпқой бокстағы мақтанышымыз Жәнібек Әлімханұлының шаршы алаңға шығатын күні жақындап қалды. Қарсыласы да осында. Кеше олар көпшілік алдында ашық жаттығу өткізді. Екеуіде бабындамыз, - дейді.
Бокстың жілігін шағып, майын ішкен мамандар қазақ стайлдың мерзімінен бұрын жеңіске жетеріне күмән келтірмейді. Жергілікті жанкүйерлерді Жәнібек жерге қаратпайтынына біз де сенеміз. Бірақ французыңыз да осал еместей көрінді. Қай кезде де қарсыласты бағалай білу керектігін Жәнібек жақсы біледі. Сондықтан босамайды деп ойлаймыз.
Дәл сол күні ағайынды Махмұд пен Төрехан Сабырхандар да кәсіпқой бокстағы алғашқы жекпе-жектерін өткізсе, Батыр Жүкембаев пен Сұлтан Заурбек секілді тәжірибелі жігіттер де шаршы алаңға көтеріледі. Өзбекстаннан Бахадүр Жалолов келді. Қысқасы 5-ші сәуір күні Барыс Аренада қызық болғалы тұр.
