Елімізде спорт саласына бөлінетін бюджет қаражатын тиімді пайдалануды қамтамасыз ететін ережелер қамтылды. Ұлттық спорт түрлері басым спорт түрлерінің қатарына қосылды. Бірер күн бұрын Сенатта дене шынықтыру және спортты дамыту туралы заң мақұлданды. Мақұлданған заңға қол қойылса, бұқараға қандай пайдасы болмақ? Бұл құжаттың жастарды спортты баулуға септігі тие ме? Бұқаралық спортты дамыту үшін қандай мехнизмдер қажет?
Бұл 80 жастағы Болат Рахимов. Агроном болып өмір бойы ауылшаруашылығы саласында қызмет еткен ол бүгінде 2 баласынан тараған 6 немеренің атасы. Бос уақытын жаттығу залдарына барып, тиімді өткізгенді жөн көреді. Соңғы жылдары аптасына бірнеше мәрте суық суға түсуді әдетке айналдырған. Ал бұл 76 жастағы Тоқтамыс Әбдиев. Бұрындары жаттықтырушы болып жұмыс істеген. Бүгінде 3 баласынан немере-шөбере сүйіп отырған ата. Қазір фитнеске, бассейнге барады, хорға да қатысады. Әсіресе спортты жаны сүйеді. Екі қария да денені шынықтыру – мықты денсаулықтың негізі екенін айтады.
Болат Рахимов, қала тұрғыны:
- Биыл 4-ші қыс осы суға түсіп жатқаныма. Денсаулығым бәрі жақсы. Маған өте ұнайды. Қан айналымы жақсарады. Жастарға спортпен шұғылдану керектігін айтамын. Адам өз-өзіне көп көңіл аудару керек.
Тоқтамыс Әбиев, қала тұрғыны:
- Бір күн спортсыз болмау керек. Саябаққа барып, көшедегі тренажерларда жаттығамын. Велосипед тебем, қыста шаңғы, коньки тебемін. Адамның өзінің ниеті болу керек.
Бұқаралық спорт қолжетімді болу үшін бұқараға ортақ саяжай, саябақтарда жаттығу орындарын көптен салған дұрыс па дерсің. Түнеугүні Мемлекет басшысы IV Ұлттық құрылтайда бұқаралық спортты, оның ішінде балалар футболын дамытуға ерекше назар аударды. Яғни жеке кәсіпкерлерді балалар клубын қаржыландыруға шақыра отырып, жекеменшік клубарды көбейту керек деген ұсыныс айтты.
Қасым-Жомарт Тоқаев, Қазақстан Республикасының Президенті:
- Әрбір облыс, аудан орталығында, кент пен ауылда балаларға арналған футбол алаңы болуға тиіс. Бұл – алдағы екі жылдың міндеті. Оның орындалуын тексереміз. Елімізде футболды дамытуға баса мән беру керек деп санаймын. Сонда ғана біз бүкіл әлемге танымал әрі әлеуметтік, бұқаралық спорт саналатын осы ойынды жаңа деңгейге көтере аламыз. Балаларды, жасөспірімдерді футболға қызықтыру арқылы лудомания, нашақорлық мәселесін біршама шешуге болады.
Иә, спорт денсаулықтан бөлек, тәртіп пен талғамды, дене тәрбиесі мен ой тәрбиесін де қалыптастырады. Әйтсе де, бүгінгі жастар спортпен айналыса бермейді. Өйткені...
Блиц-сауалнама:
- Өйткені кейбір секциялардың бағалары өте қымбат болады. Баласын спортқа беру әр отбасының қолынан келе бермейді.
- Балаларды спортқа тәрбиелеп, дамыту керек. Көп алаңдар салса, стадион салса. Сонда көп мүмкіншілік болады деп ойлаймын.
- Біздің қазақ спортқа жақын ғой. Мүмкіншілік жасаса халыққа. Көп жерде тегін қылса.
Көп жерде болмаса да кей жерлерде тегін секциялар бар-ақ. Бірақ олар өте аз. Солардың бірі Абай облысындағы таэквондо мектебі. Бірнеше чемпиондарды дайындаған әйгілі жаттықтырушы «Туған жерге туыңды тік» деген ұранмен Семей қаласында бірнеше спорт мектебін ашқан.
Махаббат Советхан, ҚР Еңбек сіңірген жаттықтырушысы:
- Балаларымыз компьютер, телефонда отырып қалады. Сол балаларды спортпен айналыссын деп шақырып отырмыз. Тегін дайындаймыз балаларды. Абай облысында 2,5 мың адамдар дайындалады.
Түнеугүні жоғарғы палата депутаттары дене шынықтыру және спортты дамыту туралы заңды мақұлдады. Бұл Президенттің Токио Олимпиадасынан кейінгі тапсырмасы негізінде әзірленген болатын. Сондықтан болар, ел ішінде жоғары спортқа ғана көңіл бөлініп, бұқралық спортты қаржыландыру қысқарып қалады, спорт үйірмелері жабылып қалады деген үрей де жоқ емес.
Әсем Рахметова, ҚР Парламенті Сенатының депутаты:
- Ондай дүние болмайды. Керісінше, спорт түрлері азайғаннан кейін оларды қаржыландырудан түсетін қаржы өзге спорт түрлерін дамытуға, инфрақұрылымдық нысандарды салуға, сол салада еңбек етіп жатқан мамандардың жалақыларын өзгертуге жұмсалады деген жоспар бар. «Арт спорт», «бала спорт» сияқты мемлекеттік бағдарламалар ары қарай жалғаса беретін болады.
Құралай Жұмахан, тілші:
- Бұқаралық спортты дамыту – ұлт саулығының негізі. Ол үшін қоғам да, жеке адам да бір кісідей жұмылып, күш біріктіргені абзал. Ендеше ауырып ем іздегенше, ауырмаудың жолын іздейік.
Құралай Жұмахан, Мейірбек Беспаев, Таир Мерекенов
