Еліміздің түкпір-түкпірінен келген мыңнан аса үміткер ел кубогы жолындағы жарыста бақ сынап жатыр. Мұнда тек ересектер ғана емес, жастар да бар. Грэпплингтің қыр-сырын енді ғана меңгере бастаған жас өрендерде жарыс жолына шықты. Мамандар осы бір спорт түрінің елімізде қанатын кеңге жайып келе жатқанын тілге тиек етеді. Өткен жылғымен салыстырғанда қатысушылардың саны екі есеге артқан. Осы жолы ел кубогына иелік еткен спортшылар ұлттық құрама сапына шақыртылып, халықаралық турнирлерде ел намысын қорғайды.Турнир жеңімпаздары жексенбі күні белгілі болады. Параволейболшылар жапондарды жеңді
Қазақстан параволейболшылар құрамасы Жапониямен жолдастық кездесу өткізді. Волейболды отырып ойнау спорт түрі паралимпиада бағдарламасында бар және қазақстандық команда былтыр алғаш рет Париждегі байрақты бәсекеге қатысып, бесінші орынға тұрақтаған болатын. Бұл отандық спорт үшін тарихи нәтиже. Міне, содан бері осы бағытты жүйелі дамытуға және кеңінен насихаттауға ерекше көңіл бөлініп келеді. Осы мақсатта жолдастық кездесу елордадағы ірі сауда орталықтарының бірінде ұйымдастырылып, жерлестеріміз 3:0 есебімен жеңіске жетті. Енді біздің жігіттер Жапонияға қонаққа барып, қарымта ойын өткізуді жоспарлап отыр. «Мұның барлығы тәжірибе жинап, шеберлік шыңдауға жақсы мүмкіндік», - дейді мамандар.
Түркістанда ескек есушілердің көктемгі ел біріншілігі жалғасып жатыр
Түркістан қаласында олимпиадалық стандартты ескек есу каналында байдарка мен каноэде есуден ересектер арасында көктемгі ел біріншілігі жалғасуда. Айтулы додаға еліміздің 11 өңірінен ең мықты ескекшілер қатысып, әртүрлі қашықтықта жүлделі орындарды сарапқа салып жатыр. Елшілік додада Түркістан облысының спортшылары жоғары дайындықпен келгендерін байқатты. Тәжірибелі маман Денис Жәрменов жетекшілік ететін облыстық су спорт түрлерінен олимпиада резервінің мамандандырылған балалар мен жасөспірімдер спорт мектебінің шәкірттері бұған дейін де бірнеше рет республикада топ жарса, енді жергілікті жанкүйерлер алдында да жүлде алсақ деп отыр. Жарыс қорытындысында үздік атанған спортшылар ұлттық құрамаға шақырту алып, Қытайдың Нанчанг қаласында 8-10 мамыр күндері өтетін Азия чемпионатында ел намысы үшін жарыс жолына шығады.
