Дәстүрлі садақ атудан тұңғыш әлем чемпионатында топ жарған спортшылар елге оралды.
Оңтүстік Кореяның Ульсан қаласында өткен байрақты бәсекеге әлемнің 38 елінен 700-ше жуық спортшы қатысты. Құрама қоржынында 4 алтын, 2 күміс және 2 қола медаль бар. Астаналық 22 жастағы Айкөркем Батихан жамбы нысанасында 1-ші, пута нысанасында 2-орын алып, бірден садақ атудың екі түрінен үздік шықты.
Айкөркем Батихан, дәстүрлі садақ атудан әлем чемпионы:
– 200-ге тарта әйел адамдар қатысты. Сол себепті конкуренция өте жоғары болды. Осы жеңісімнің барлығын Қазақ еліне арнаймын.
Нартай Аралбайұлы, республикалық дәстүрлі садақ ату федерациясының президенті:
– Бұл өте үлкен жетістік, үлкен мереке. Халықаралық дәрежедегі спорттық жарыстарға барғанда біздің мықты спортшыларымызға құда түсетіндер өте көп. Бұл дәстүрлі садақшылардың мемлекетке тартып жатқан инвестициясының бір бөлігі.
