АҚШ 10 жылда жабылған АЭС-тің кейбіреуін қайта іске қоспақшы
АҚШ билігі соңғы 10 жылда жабылған 13 атом электр станцияларының кейбіреуін қайта іске қосайын деп отыр.
Бұл туралы Bloomberg ақпарат агенттігі хабарлады. Ресейге қарсы санкциялардың салдарынан станцияларды ядролық отынмен жабдықтау қиындап кетуі мүмкін. Алайда сарапшылардың айтуынша, уранмен Қазақстан және Канада қамти алады. Жалпы АҚШ атом энергетикасын өткен ғасырдың 70-ші жылдарынан бастап кеңінен қолдануға көшкен.
Бұл Мэриландтың оңтүстік-батысындағы Калверт Клифс атом электр станциясы. Қос реактордан тұратын орталықтың қуаты 1 млн 300 мыңнан аса үйді электр энергиясымен қамтамасыз етуге жетеді. Мэриландтан бөлек, АҚШ-тың 28 штатында 93 атом реакторы орналасқан. Әрқайсысы кемі 60 жыл жұмыс істейді. Мамандар: «Бұл энергетиканы қолға алу заман талабына сай болды», - дейді.
Халимеда Килборн, Мэриленд университеті Қоршаған ортаны зерттеу орталығының профессоры:
- Халықтың түрлі пікірде болуы қалыпты жағдай. Бірақ ғылым тұрғысынан айтар болсақ, ядролық энергетика – адамзатты қуатпен қамтамасыз етудің ең тиімді жолы.
АҚШ-та алғашқы атом электр станциясы 1958 жылы салынды. Алпауыт елдің мұнай, көмір және газ сияқты дәстүрлі қуат көздерінен бөлек ядролық энергетикаға көшуінің бірнеше себебі бар. Солардың бірі – атом энергиясының шығыны. Аз әрі тиімді болуына байланысты. Жергілікті мамандар жалпы атом энергетикасы қауіпсіз екенін де алға тартады.
Халимеда Килборн, Мэриленд университеті Қоршаған ортаны зерттеу орталығының профессоры:
- Бізде атом электр станцияларындағы қауіпсіздікке көп мән беріледі. Ол үшін алаңдаудың еш қажеті жоқ. Сонымен қатар ядролық қуат көзін өндіру ядролық қарудың таралуына алып келеді деп ойлау да жаңсақ пікір. Себебі АҚШ-та атом энергетикасында басқа материалдар қолданылады.
Қауіпсіздік мәселесі қозғалғанда, атом энергетикасының экологияға әсерін айтпай өтуге болмас. Бұл тұрғыдан алғанда, атом электр станциялары ұтымды. Себебі көмір мен мұнайға қарағанда парниктік газдарды аз шығарады, яғни ауаны ластамайды.
Талғат Алманов