Екпе салудан бас тартатындар қатары азайып келеді

Соңғы бір айдың ішінде емханаға бұрын қарсылық танытқан 12 отбасы келіпті. Олар қатерлі дерт пен жұқпалы аурулардың алдын алу үшін жаңа жылдан бері түрлі вакциналарды жаппай ектіріп жатыр. 7-12 жас аралығындағы балалар өмірінде алғаш рет екпе алған. Дәрігерлер бұрындары үйлеріне жолатпайтын ата-аналардың екпенің маңызын түсінгеніне қуанышты. Мәселен, №2 қалалық емханада қазір екпе салынбаған 11 бала ғана бар.

Жанна Шанытбаева, №2 қалалық емхана директорының орынбасары:

- Бұрын діни ағымдағы ата-аналар екпе салудан мүлде бас тартатын. Біздің дәрігерлермен сөйлеспейтін. Дәрігерлер үйіне барса, баланы қаратпай, мейірбекелерден мүлде бас тартқан. Енді қазір сол діни ағымдағы адамдар ойларын өзгертіп, бастапқыда 1 екпе, одан кейін қалған екпелерді жалғастыруда.

Айдос Мүтәлиев, «Ар-рахман» мешітінің бас имамы:

- Әрине бұл жерде медицинаның дамығанын айта аламыз. Себебі бұған дейін біздің елімізде қызылшадан қаншама халықтың қырылғанын тарихтан білеміз. Ал қазір қоғамда одан аман-есен шығудың себебі – оған қарсы екпенің салынуы. Шариғатта бұл екпе алуды немесе алдын алудың басқа да түрлеріне ешқандай тыйым салмайды.