Өрт сөндірушілер орман өртімен күресуге қаншалықты қауқарлы?

Елімізде «Өрт-2024» оқу-жаттығуы басталды. Оған құтқарушылармен қатар орманшылар да қатысып жатыр. Олар әзірліктерін пысықтады.

Мәселен, Астана іргесіндегі орман алқабында астаналық өрт сөндірушілер өз дайындықтарын көрсетті. Қолдан жағылған отты сөндіруге Төтенше жағдайлар департаменті жеке құрамының 75 адамы мен 25 бірлік техникасы жұмылдырылды. Одан бөлек бірнеше орманшы көлігі де атсалысты.

Құзырлы орган өкілдерінің сөзінше, елорданың өзінде өткен бір айдың ішінде маңайдағы құрғақ шөп пен қамыс 15 рет тұтанған. Ал оның соңы орман өртіне ұласуы әбден мүмкін. Сондықтан дайындық та, шұғыл қимылдау да маңызды.

Мадияр Мырзагелдиев, қалалық ТЖД бастығының орынбасары:
- Ең тез дегенде біздің техникалар 10 минутта келе алады. Тағы да айта кететін болсақ, қазір өрт қауіпті маусымы басталғалы бері «Астана орманы» қызметкерлерімен күнделікті 40-тан астам адам кезекшілікке түседі. Сондай-ақ басқа да өрт қауіпсіздігі шаралары бойынша жұмыстар жүргізіледі.