Ақтөбелік ұстаз 50 жасында ағылшын тілінде дәріс беріп жүр
Ақтөбе қаласының тұрғыны Ұлболсын Дүзбаева 50 жасында шет тілін меңгеріп, ағылшын тілінде дәріс беріп жүр. Физика пәнінің мұғалімі «Дарынды шәкірт – білікті ұстаздан», - дейді. «Оқытушы өзі білімін үнемі жетілдіріп отыруы тиіс» деген ұстанымда.
Ұлболсын Дүзелбаеваның еңбек өтелі 40 жылға таяған. Ұлағатты ұстаз үйретуден де, үйренуден де жалықпайды. Сабақ жүргізудің жаңа әдіс-тәсілдерін игеріп ғана қоймай, 50 жастан асқан шағында шет тілін меңгерді. Қазір жоғарғы сынып оқушыларына физика пәнін ағылшын тілінде оқытады.
Ұлболсын Дүзелбаева, физика пәнінің мұғалімі:
- Бүгінгі педагог бесаспап болуы тиіс деп ойлаймын. Жаңа технологияларды игеріп, балаларға заман талабына сай сапалы білім беруі керек. Физика пәні де күнделікті жаңалықтармен толығып отырады. Сондықтан әрдайым ізденісте болуы керек. Өмір бойы оқу-білімге құштар болған абзал.
Тәжірибелі педагог Ұлболсын Дүзелбаева – әріптестеріне үлгі. Білікті маман ауылдағы шағын жинақты мектептердің мұғалімдеріне де дәріс береді. Физика пәнін оқушыларға түсінікті әрі қызықты етіп жеткізудің айла-тәсілдерімен бөлісіп отырады.
Мират Оспанов, физика пәнінің мұғалімі:
- Ұлболсын Сүйеуқызы «аударылған сынып» моделін ұтымды пайдаланады. Әр оқушыны дамыту үшін жеке бағыт-бағдар беріп, білімін шыңдайды. Бұл нағыз білікті маманға тән қасиет.
Ағылшын тілін жатық меңгеру үшін Ұлболсын Сүйеуқызы бірнеше рет Ұлыбританияда болып, арнайы дәріс алған. Қазір сарапшы-педагог еліміздегі оқу бағдарламасын жетілдіруге атсалысып жүр. Ағылшын тілінде дәріс беретін орта мектептерге арналған есеп-қисап жинағының авторларының бірі.
Алина Әлиева, оқушы:
- Ұлболсын апай бізге ерекше түрде түсіндіреді. Мысалы, практикалық сұрақтарды бізге өмірдегі мысалдармен көрсетеді. Және ол тек қана теория емес, ол практик. Және сол үшін физика пәні сүйікті.
Ұлболсын Дүзелбаева: «Үйренуден жиренген оқытушы педагог болудан қалады», - дейді. Ол білімді, білікті, парасатты, жаңашыл шәкірт тәрбиелеуді мақсат тұтқан ұлағатты ұстаз.
Мансұр Есқожин, Болатбек Молдағалиев