Ақтау маңындағы ұшақ апаты: соңғы мәліметтер. LIVE

Оқиға орнында біздің тілшілеріміз де жұмыс істеп жатыр. Маңғыстау облысындағы әріптесім Еркебұлан Смадияров қазір бізбен тікелей байланысқа қосылды. 

Біз қазір ұшақ құлаған аумақта тұрмыз. Мынау әзербайжандық ұшақтың артқы бөлігі. Апаттан аман қалғандардың дені осында отырған. Қазір Ақтаудағы орталық ауруханада 27 адам жатыр. 11-і жансақтау бөлімінде. Сондай-ақ 10 және 15 жастағы қыз балаларға дәрігерлік көмек көрсетілді. Олардың жағдайы жақсы. Қайғылы оқиғаны естіген тұрғындар облыстық қан орталығына барып, 115 адам қан тапсырды. Ұшақ апатынан тірі қалғандар Әзербайжан, Ресей, Қырғызстан азаматтары. Тағы екі жолаушының жеке бас дерегі анықталып жатыр. Ұшақ апаты болған аумақта электр желілерін жөндеп жатқан жұмысшылар шұғыл көмекке келіп, 15 адамды қауіпсіз аумаққа шығарғаны айтылды. Қазір мұнда полиция, төтенше жағдайлар қызметкерлері жұмыс істеп жатыр. Маңғыстаулықтар Әзербайжан елінің Ақтаудағы елшілігіне барып, көңіл айтып, ғимарат ауласына гүл шоқтарын қойып жатыр.