Әйгілі Кабирхан Көшпенділер ойынына қатысуы мүмкін

Бірнеше халықаралық бәйгеде топ жарған қазақстандық тұлпар Қабирхан V Дүниежүзілік көшпенділер ойынына қатысуы мүмкін. Мұны Ұлттық және ат спорты түрлері орталығының қоғаммен байланыс бөлімінің басшысы Қайырхан Мәулен айтты.

Қазір ұлттық құрамада тек көкпар бойынша 30-ға жуық ат әзірленген. Оның 24-і бұған дейінгі жарыстарда жеңімпаз атанған. Ұйымдастыру дирекциясы шетелден келген спортшыларға аттарды өздері үлестіреді. Тек көрші Ресей, Өзбекстан мен Қырғызстан спортшылары ғана өз тұлпарымен келеді.

Дүбірлі доданың ашылу салтанатына бөлінген билет түгел сатылды. Ойынның басқа күндері алыпсатарлыққа жол бермес үшін бір қолға 4 билеттен артық сатпау туралы шешім қабылданды. Көшпенділер ойыны қыркүйектің 8-і мен 13-і аралығында Астанада өтеді.

Абылай Қондыбаев, V Дүниежүзілік көшпенділер ойындарына дайындық және өткізу дирекциясы басшысының орынбасары:

- Ашылу салтанатына билеттер қалмады. Ал қалған басқа барлық спорт түрлеріне билеттер сатылып жатыр. Бүгінгі таңда біз 10 мыңнан аса билетті сатқан болатынбыз барлық спорттық шараларға. Осы жұмыстар жүргізіліп жатыр. Негізгі осы ең қызығушылық танытып жатқан спорт түрлерінің арасында жамбы ату, дәстүрлі садақ ату, көкпар, бәйге сияқты спорт түрлері бар.