Қ. Тоқаев Паралимпиада ойындарының екі дүркін чемпионы Давид Дегтяревті құттықтады

Парижде өтіп жатқан байрақты бәсекеде Қазақстан қоржынына тағы бір медаль түсті. XVII жазғы Паралимпиада ойындарында Дастан Мұқашбеков ядро лақтырудан F36 санатында қола медаль жеңіп алды. Ол өзінің ең үздік мүмкіндігінде ядроны 16 метрге лақтырды. Бұл – Азия құрлығының жаңа рекорды. Айтулы додада Қазақстан құрамасы әзірге үш медаль еншіледі.

Қазақстан Президенті Қасым-Жомарт Тоқаев Паралимпиада ойындарының екі дүркін чемпионы Давид Дегтяревті құттықтады. «Давид Дегтяревті Паралимпиада ойындарының екі дүркін чемпионы атануымен шын жүректен құттықтаймын! Ол ерекше ерік-жігер танытып, жеңіс тұғырынан көрінді», – деп жазды Мемлекет басшысы өзінің әлеуметтік желідегі парақшасында. Естеріңізге сала кетейік, пара пауэрлифтингтен сынға түскен қазақстандық спортшы Парижде 188 келі зілтемірді көтеріп, Паралимпиада ойындарының екі дүркін чемпионы атанды. Бұған дейін Давид Дегтярев Токио төріндегі жаһандық жарыста топ жарған болатын.