Әлем жаңалықтары: Қытайда толассыз нөсер салдарынан 10 өзен арнасынан асты

Қытайдың орталығы мен солтүстігінде күн шыжып тұр. Бейжіңде сынап бағанасы 37 градустан асты. Тұрғындар ыстықтан сақтану үшін бас киім киіп, қолшатыр ұстап жүр. Ал елдің оңтүстігінде толассыз нөсер салдарынан 10 өзен арнасынан асты. Мыңдаған үй мен қожалықты су басты. 36 мың адам қаупсіз жерге көшіртілді.

Сауд Арабиясы

Бүгін әлемнің түкпір-түкпірінен жиналған мұсылмандар Мекке маңындағы Мина алқабына жиналып, шайтанға тас атты.  Бұл – қажылықтың негізгі бөлігінің бірі. Қазір Сауд Арабиясына төрткүл дүниеден 1,8 миллион адам барған. Елде сынап бағанасы 48 градусқа жетті. 14 адам ыстықтан қайтыс болды, 17-сінен хабар жоқ. Барлығы - Иордания азаматтары.

Индонезия

Ал мұсылман халқы ең көп - Индонезияда жұрт қақтығыстан зардап шеккен палестиндіктер үшін дұға етіп, тыныштық тіледі. Құрбандыққа мал сойып, Газа халқына қайырымдылық көмек жинады. Айта кету керек, Индонезияда 275 миллионнан аса адам тұрады.

Үндістан

Үндістандағы Батыс Бенгалия штатында теміржол апатынан 15 адам қаза тауып, ондаған жолаушы жараланды. Жүк пойызы бір бағытта келе жатқан жолаушы пойызының артына келіп соққан. Салдарынан жолаушы пойыздың бірнеше вагоны жолдан шығып кеткен. Алдын-ала мәліметке сай, жүк пойызының машинисі тоқтау туралы белгіні байқамаған.