Грекиядағы Гидра аралында орман өрті ауыздықталды – Әлем жаңалықтары

Грекиядағы Гидра аралында орман өрті ауыздықталды. Бірақ осы аралдағы жалғыз орманның бір бөлігі күлге айналды. Жергілікті ақпарат құралдарының хабарлауынша, өрттің шығуына яхта жалдап, одан отшашу атқан шетелдік туристер кінәлі. Кейбірі бұл - Қазақстан азаматтары болғанын жазған. Осы елдегі консулымыз билік өкілдерімен байланысып, бұл іске отандастарымыздың еш қатысы жоқ деген жауап алды. Прокуратура яхтада болған 13 адамды қамап, айып тақты.

Оңтүстік Корея

Оңтүстік Кореяның Хвасон қаласында аккумулятор батареясын шығаратын зауыт өртеніп, 22 адам қаза болды. 2 кісі ауыр жарақатпен ауруханаға жеткізілді. Тағы бір тұрғын іздестіріліп жатыр. Құрбандардың арасында шетелдіктер бар. Олардың 18-і Қытай азаматы, ал біреуі лаостық. Хвасон қаласында ТМД елдерінің азаматтары тұрады, қазақстандықтар да бар. Қазақстан елшілігі өрттен қазақстандықтар жапа шеккені жайлы ақпар түспегенін хабарлады.

Қытай

Қытайда су тасқынынан жағдай ушығып барады. Өзендер тасып, жүздеген қала мен елді мекенді су басты. 300 мыңға жуық адам үй-жайын тастап, қауіпсіз жерге көшті. Мыңдаған гектар егісті су шайып кетті. Тасқын кезінде 38 адам көз жұмды. 20 адам іздестіріліп жатыр.

Испания

Ал Испанияның оңтүстігінде күн шыжып тұр. Кордова қаласында сынап бағанасы 39 градусқа дейін жетті. Жалпы бұл шаһарды Испанияның қайнаған қазаны деп атайды. Ми қайнатар ыстық жергілікті тұрғындар мен туристерді әбігерге салып жатыр.

Сауд Арабиясы

Сауд Арабиясының денсаулық сақтау министрі қажылық кезінде 1 мың 301 адам көз жұмғанын хабарлады. Жартысынан көбі мысырлықтар. Қалғаны Индонезия, Иордания, Үндістан, Тунис және Сенегал елдерінің азаматтары. Еліміздің сыртқы істер министрлігі олардың арасында қазақстандықтар жоқ екенін айтты. Қайтыс болғандардың 83 проценті қажылыққа заңсыз барған.