Бизнес тарапынан несиеге деген сұраныс азайып келеді

Ұлттық Банк дерегінше, несиеге өтініш беру көрсеткіші бірінші тоқсанда да төмендеген. Оның ішінде негізінен шағын және орта бизнес өкілдері кредит алуды азайтқан. Себебі түсінікті, несиенің құны жоғары елімізде. Ақша-несие саясатына тікелей әсер ететін базалық ставка осы айда да өзгермейтін болды. Ұлттық Банк мөлшерлемені 16,75% деңгейінде сақтаймыз деген шешімін жариялады. Өйткені сыртқы ортаның бағаға деген қысымы әлсіреген. Әлемдік инфляция қарқыны бәсеңдеген. Ұлттық Банк төрағасы Ғалымжан Пірматовтың айтуынша, бұл елдегі азық-түлік бағасының өсімін 17,9% баяулатып отыр. Бас банкир мөлшерлеме мөлшерден тыс ауытқымаса, инфляция 11-14%-ға төмендеуі мүмкін деп болжап отыр. Қаржы министрі жыл соңына дейін бұл көрсеткішті 10% дейін төмендетеміз деп уәде берген. Ұлттық Банктің базалық мөлшерлеме бойынша кезекті шешімін 5 шілдеде жариялайды. Базалық ставка – орталық банктің несие ұйымдарына кредит берер кезіндегі минималды ставкасы және банк депозиттерін қабылдау бойынша максималды мөлшер екенін еске саламыз. 

Ғалымжан Пірматов, ҚР Ұлттық Банк төрағасы:
- Жалпы алғанда баяулауға қарамастан, инфляциялық процестер ішкі сұраныстың тұрақты болуынан инерциялық сипатын сақтайды. Өзгерген геосаяси жағдай салдарынан логистикалық және өндірістік тауар жеткізу жолдарын қайта құру үдерісі бағаның өсуіне әсер етуде.