Хабар телеарнасы

Швециядағы әскери музейден елімізге 182 экспонат жеткізілген

Сонау Екінші дүниежүзілік соғыс кезінен қалған темір ыдыстағы қою сүт, қаңылтыр құтыдағы шоколад, темекі қорабы және Бірінші дүниежүзілік соғыс кезеңіне тиесілі күміс қасық пен шанышқы, бейсбол таяғы. Барлығын Қарағандыдағы тарихи-өлкетану музейінде «Өмір мен өлім арасындағы заттар» көрмесінен көре аласыз. Боксер қолғабы, радиоқабылдағыш, сусабын секілді 182 экспонат түгелдей Швецияның Стокгольмдегі әскери музейінен жеткізілген. Жеңіс мерекесі қарсаңында өткен көрменің ерекшелігі – бір де бір қару, әскери киім жоқтығы. Тек жауынгерлердің күнделікті қолданған заттары қойылған.

Ержан Нұрмағанбетов, облыстық тарихи-өлкетану музейінің директоры:

- Көрменің тағы бір ерекшелігі, бұл – артефактілердің әртүрлі армияларға жатуы. Оның ішінде неміс, француз, въетнам, ағылшын, орыс армиясы бар. Әрбір солдат өзінің сөмкесіне салып, кезінде ұстап жүрген дүниелер. Қазір соның бәрі халыққа мұра болып қалды.