Іссапарлар мен сыйақы қаржысын жымқырған шенеунікке қатысты сот үкімі шықты

«Қазсушар» республикалық мемлекеттік кәсіпорны филиалының бұрыңғы директоры Серікжан Жақаев өзінің қызметтік бабын асыра пайдаланып, қарамағындағыларға түрлі жалған іссапарларды рәсімдеп отырған. Осылайша ол жолға берілетін қаражатты қалтасына басып келген. Сондай-ақ мемлекеттік сатып алулар мен жұмысшыларға сыйақы беруге бөлінген бюджет қаржысын да жымқырған.

Күдіктіге «кәсіпкерлерден пара алды» деген айып та тағылып отыр. Мемлекетке келтірілген шығын – 6,5 млн теңге. Айта кету керек, сот процесіне экс-шенеуніктің қорғаушысы қатысқан жоқ.

Михаил Гусев, қалалық соттың судьясы:

- ҚР ҚК 58 бабы, 3-тармағы негізінде Серікжан Жақаевты 4 жылға бас бостандығынан айыру жазасы тағайындалсын! Ол өмір бойы мемлекеттік қызметте жұмыс істеу құқығынан айырылсын! Жазасын орта қауіпсіздік деңгейіндегі түрмесінде өтесін!