Павлодарлық тұрғын Ришат Шайхитдинов скейтпен саяхатқа шықты

Осы күнге дейін ол 1 мың 250 шақырымдық жолды еңсерген. Саяхатшы күнделікті тірлігімен әлеуметтік желіде бөлісіп отырады. Ришат Шайхитдинов Павлодардан Алматыға екі апта бұрын аттанды. Алдымен логбордпен жүру техникасын меңгеріп, кейін жолға шықты. Аздаған азық-түлік, киім-кешек пен лонборд. Ришатқа жолда ең керегі – осы заттар. Бүгінде саяхатшы күніне 100 шақырымдық қашықтықты еңсеріп келеді. Ауа райы қолайлы, ал жол жақсы болса болғаны.

Ришат Шайхитдинов, саяхатшы:

- Саяхат барысында мейрімді жандарды кездестірдім. Барлығы қолпаштап, қолдау көрсетеді. Көлік тізгіндегендері көмектерін ұсынып жатады. Алғысым шексіз. Олар осы әрекеттерімен мені ынталандырады.

Бұл – Ришаттың алғашқы сапары емес. Бұған дейін турист ретінде Қазақстан және Ресейдің көрікті жерлерінде болды. Сонымен қатар Армения, Грузия. Түркия, Моңғолия мен Оңтүстік Кореяға саяхат жасап, аталған елдердің мәдениетімен танысқан.

Ришат Шайхитдинов, саяхатшы:

- Саяхаттау кезінде жаңа адамдармен танысуды ұнатамын. Түрлі халықтардың мәдениеті мен тұрмыс-тіршілігі туралы мол мағлұмат білемін. Сонымен қатар денем шынығады. Осылайша, рухани және спорттық жағынан дами түсемін.

Ришаттың негізгі мамандығы – геоэколог. Алыс сапарлар мен қызықты саяхаттарға құштарлығы сондықтан. Алдағы уақытта роликті тақтайшамен еліміздің өзге де қалаларын араламақ.

Авторы: Ақмарал Есімханова