18:00Эфирде: Мегахит «Паранойя»
+7 (7172) 757 540
astananews@khabar.kz

Алматылықтар жасыл желектің орнына құрылыс салуға наразы

  • Категория: Қоғам
Алматылықтар жасыл желектің орнына құрылыс салуға наразы

Бір топ алматылық тұрғын шенеуніктердің әрекетіне наразы болып отыр. Себебі олардың дәл үйінің жанында бір түнде құрылыс алаңы пайда болған.

Бұған дейін сол маңдағы көгал мен жасыл желек жұртшылықты шаң-тозаңнан қорғап келген еді. Енді оның орнына фаст-фуд желісінің павильоны орналаспақ. Жер учаскесі былтыр 3 жылға жалға беріліпті.

№472 үй Сейфуллин даңғылы мен Төле би көшесінің қиылысында орналасқан. Мұнда күндіз-түні көлік қозғалысы тынбайды. Үйдің бірінші қабатында 15 сауда нүктесі жұмыс істейді. Соның ішінде қоғамдық тамақтандыру орындары тәулік бойы қызмет көрсетеді.

Тұрғындардың айтуынша, фаст-фуд сататын дүңгіршек былтыр бір-ақ түнде пайда болыпты. Бұл жұмыс биыл да тоқтар емес. Көктемде құрылысшылар келіп, көгалды қопарып, бұталарды жұлып тастап, қиыршық тас төсеп тастаған. Бір қызығы, осының бәрін түнде ғана жасаған. 

Әйгерім Әлібекова, қала тұрғыны:

- Құжаттарға сәйкес, былтыр 21 қыркүйекте әкімдік бұл жер телімін Әлеуметтік кәсіпкерлік корпорациясына берген. Ал олар құжатты «Дегирменге» берген. Біз бұған қарсымыз. Құқығымыз бұзылды деп санаймыз. Заң бойынша қоғамдық тыңдау өтуі керек еді. Жер телімінің жеке меншікке өтіп кеткенін біз енді ғана біліп отырмыз. Құрылысқа тұрғындар түгелдей қарсы.

Тұрғындардың айтуынша, көше бойындағы жасыл желек пен жаяу жүргіншілерге арналған жол көпке ортақ. Дәл осыған ұқсас жағдай Момышұлы мен Төле би көшелерінің қиылысында да қалыптасып отыр. Соған қарағанда жергілікті билік жасыл алаңқай мен гүлзарларға келгенде бас ауыртқысы келмейтін сияқты.

Айсұлтан Мұхамеджанов, қалалық жер қатынастары бөлімінің бас маманы:

- Әлеуметтік-кәсіпкерлік корпорациясының өтініші бойынша, инвестициялық жобаны жүзеге асыру үшін Алмалы ауданындағы Төле би көшесі мен Сейфуллин даңғылының бойындағы жер учаскесі 3 жыл мерзімге жалға берілді. Айта кетейін, стационарлық емес сауда нысаны.

Әкімдік өкілдерінің сөзінше, келісімшартта көгал туралы айтылмаған. Ал қоғамдық тыңдаулар тек қана тұрғын үй кешені мен сауда орталықтарын салар кезде ғана өткізіледі. Ал мұндай уақытша қойылған нысандар бойынша тұрғындарды ескертпесе де болады екен.

Ал қарапайым жұртшылық: «Ондай сауда орындары мерзімінде алынбай ұзақ уақытқа қалып қояды», - деп дабыл қағып отыр. Олар: «Жергілікті билік шағын және орта бизнестің ғана емес, тұрғындардың пікірін ескерсе екен», - дейді. Ал әзірге №472 үйдің маңындағы құрылыс тоқтатылып, мән-жай анықталып жатыр.

Авторлары: Қарлығаш Қайыпбекова, Кенже Амраев

Сондай-ақ...